ఉత్తరప్రదేశ్ సోన్భద్ర ఘటన బాధితులను కలిసే అంశమై జైలుకు వెళ్లేందుకైనా సిద్ధమేనని ప్రకటించారు కాంగ్రెస్ ప్రధాన కార్యదర్శి ప్రియాంక గాంధీ. సోన్భద్రలో జరిగిన భూవివాదంలో ప్రాణాలు కోల్పోయిన వారి కుటుంబాలను పరామర్శించేందుకు వెళ్తున్న ప్రియాంకను పోలీసులు అడ్డుకున్నారు. అదుపులోకి తీసుకుని చునార్ అతిథి గృహానికి తరలించారు. అక్కడా ప్రియాంక ధర్నాకు దిగారు.
రాష్ట్రంలో నెలకొన్న పరిస్థితులపై దేశానికి తెలిపేందుకే యూపీకి వచ్చానని ఉద్ఘాటించారు ప్రియాంక. ఘటన జరిగిన గ్రామానికి వెళ్లకుండా ఉండాలని జిల్లా పాలనాధికారి, ఎస్పీలు ప్రియాంకకు నచ్చచెప్పే ప్రయత్నం చేశారు. వ్యక్తిగత పూచీకత్తు సమర్పించి వెనక్కి వెళ్లాలని సూచించారు. కానీ అందుకు ప్రియాంక తిరస్కరించారు. ప్రస్తుత పరిస్థితుల్లో బెయిల్ తీసుకోవడం అనైతికమని వ్యాఖ్యానించారు.
'అరెస్ట్ చేసి 9గంటలు అయింది'
తనను నిరంతరం పోలీసులు వెంబడించడంపై ట్విట్టర్ వేదికగా వ్యంగ్య వ్యాఖ్యలు చేశారు ప్రియాంక. తనను అరెస్ట్ చేసి తొమ్మిది గంటలయిందని పోస్ట్ చేశారు.
'బాధిత కుటుంబాలను కలవడం నేరమా?'
బాధిత కుటుంబాలను కలవడం నేరమెలా అవుతుందని ప్రశ్నించారు ప్రియాంక. ఒక్కరుగానే వెళ్లి బాధిత కుటుంబాలను పరామర్శించాలని అనుకుంటున్నట్లు ముందే వెల్లడించానని స్పష్టం చేశారు.
అంతకుముందు వారణాసిలోని ఆసుపత్రిలో చికిత్స పొందుతున్న బాధితులను పరామర్శించారు ప్రియాంక.
పలు రాష్ట్రాల్లో నిరసనలు
ప్రియాంక గాంధీని అదుపులోకి తీసుకున్నందుకు కాంగ్రెస్ పార్టీ ఆగ్రహం వ్యక్తం చేసింది. పలు రాష్ట్రాల్లో యూపీ ప్రభుత్వ చర్యకు వ్యతిరేకంగా కాంగ్రెస్ పార్టీ నేతలు నిరసనలు చేపట్టారు. ఉత్తరప్రదేశ్, జమ్ము కశ్మీర్, బంగాల్, మహారాష్ట్ర తదితర రాష్ట్రాల్లో కాంగ్రెస్ కార్యకర్తలు ఆందోళనలు చేపట్టారు. దిల్లీలోని భాజపా ప్రధాన కార్యాలయం ఎదుట హస్తం కార్యకర్తలు ధర్నాకు దిగారు.
ప్రియాంక గాంధీని అదుపులోకి తీసుకుని చునార్ అతిథి గృహంలో ఉంచడం ద్వారా 10మంది మృతిని యూపీ ప్రభుత్వం కప్పి పుచ్చగలదా అని ప్రశ్నించారు కాంగ్రెస్ అధికార ప్రతినిధి రణ్దీప్ సుర్జేవాలా.
సోన్భద్ర భూవివాదం
బుధవారం సోన్భద్రలోని ఘోరావల్ వద్ద రెండు వర్గాల మధ్య భూమి విషయమై ఘర్షణ జరిగింది. ఈ ఘటనలో ఒక వర్గానికి చెందిన వారు మరొక వర్గంపై కాల్పులు జరిపారు. ఫలితంగా 10 మంది చనిపోయారు. మరో 28 మంది గాయాలపాలయ్యారు.
ఇదీ చూడండి: అసోంను ఆదుకుంటాం: ప్రధాని నరేంద్ర మోదీ
