దేశవ్యాప్తంగా వేర్వేరు సంస్థల్లో పనిచేస్తున్న ప్రైవేటు సెక్యూరిటీ గార్డ్లు రద్దీ నియంత్రణ, అగ్నిమాపక నిర్వహణ, గుర్తింపు కార్డుల పరిశీలనలపై ప్రత్యేక శిక్షణ తీసుకోవాలని కేంద్రం ఆదేశించింది. 20 రోజుల ఈ కార్యక్రమంలో... 100 గంటలు తరగతి గది బోధన, 60 గంటల పాటు క్షేత్ర స్థాయి శిక్షణ నిర్వహించాలని పేర్కొంది. గతంలో సైనిక, పోలీసు విభాగంలో పనిచేసిన వారికి.. శిక్షణా కాలపరిమితిని కుదించింది హోం శాఖ. వారు 40 గంటల తరగతి గది పాఠాలతో పాటు ఏడు పనిదినాల్లో 16గంటల క్షేత్రస్థాయి శిక్షణకు హాజరు కావాలని సూచించింది.
ఈ శిక్షణా కార్యక్రమంలో శారీరక దృఢత్వం- రక్షణ, ఆస్తుల పరిరక్షణ, బిల్డింగ్/అపార్ట్మెంట్ భద్రత, విపత్తులు, ఆయుధాల నిర్వహణ సహా.. గుర్తింపు కార్డులు/పత్రాలను పరిశీలించడం వంటి వాటిపై శిక్షణ అందించనున్నారు.
ఏజెన్సీ యాజమానులకూ..
ప్రైవేట్ ఏజెన్సీలను నిర్వహిస్తోన్న యజమానులకూ శిక్షణను తప్పనిసరి చేసింది కేంద్రం. వారు కూడా అంతర్గత భద్రత, విపత్తు నిర్వహణ వంటి అంశాలపై తర్ఫీదు పొందాలని సూచిస్తూ.. ఈ విధివిధానాలు తక్షణమే అమల్లోకి వస్తాయని వెల్లడించింది.
ప్రైవేట్ సెక్యూరిటీ ఏజెన్సీస్(రెగ్యులేషన్) యాక్ట్-2005లోని సెక్షన్ -24 ప్రకారం.. ఈ ఉత్తర్వులు జారీ చేసింది హోం శాఖ. ప్రైవేట్ సెక్యూరిటీ ఏజెన్సీస్ సెంట్రల్ మోడల్ రూల్స్-2020గా పిలిచే ఈ నిబంధనల్ని అన్ని ఏజెన్సీలు తప్పనిసరిగా అమలు చేయాలని నోటిఫికేషన్లో పేర్కొంది. ఈ మేరకు ఆయా ఏజెన్సీలలో నియామకం పొందిన సెక్యూరిటీ గార్డు లేదా ఏజెన్సీపై ఏవైనా నేరారోపణలు ఉంటే.. సంబంధిత లైసెన్స్దారులు ప్రభుత్వానికి తెలియజేయాలని స్పష్టం చేసింది కేంద్రం.
దేశవ్యాప్తంగా సుమారు 90లక్షల మంది ప్రైవేట్ సెక్యూరిటీ గార్డ్లు ఉన్నారని కేంద్ర హోంశాఖ తెలిపింది. వారిలో సైనిక, పోలీసు విభాగాల నుంచి వచ్చిన వారు సుమారు 30 లక్షల మంది వరకు ఉన్నారని పేర్కొంది.
ఇదీ చదవండి: 'కారుణ్య నియామకాల్లో వివాహిత కుమార్తె అర్హురాలే'
