'ఆత్మనిర్భర శంఖారావంతో ప్రపంచానికి మన శక్తిని చాటుదాం'

'ఆత్మనిర్భర భారతంతో ఆరోగ్య భారత్​'

74వ స్వాతంత్య్ర దినోత్సవం సందర్భంగా దిల్లీ ఎర్రకోట వేదికగా సుదీర్ఘంగా ప్రసంగించారు ప్రధానమంత్రి నరేంద్ర మోదీ. ఆత్మనిర్భర భారత్​, ఆరోగ్య భారత్​ సహా.. లద్దాఖ్​ ఘటన, అయోధ్య భూమిపూజ, ఆరేళ్లలో సాధించినవి, జల్​జీవన్​ మిషన్​, సంస్కరణలు, ప్రాజెక్టులు, కరోనాపై పోరాటం, వ్యాక్సిన్​ సంబంధిత విషయాలపై మాట్లాడారు.

'వోకల్​ ఫర్​ లోకల్​'

ప్రసంగమంతటా ఆత్మనిర్భర్​ భారత్​ గురించే ప్రధానంగా ప్రస్తావించిన నరేంద్ర మోదీ.. ఆత్మనిర్భర్​ భారత్​ దేశప్రజలందరి సంకల్పం కావాలని ఉద్ఘాటించారు. లోకల్​ కోసం వోకల్​గా మారాల్సిన తురణం ఆసన్నమైందని నొక్కిచెప్పారు. రవాణా హెలికాప్టర్ల నుంచి రైఫిళ్ల వరకూ భారత్​లోనే తయారీకి కట్టుబడి ఉన్నట్లు స్పష్టం చేశారు. భారత్​ ఎందులోనూ తక్కువకాదని నిరూపించాలన్నారు. భారత వస్తువులను విశ్వవ్యాప్తం చేయాలన్న సంకల్పంతో ముందుకెళ్లాలని చెప్పారు.

ప్రతి పౌరుడికి హెల్త్​ ఐడీ

కరోనా సంక్షోభాన్ని దృష్టిలో పెట్టుకొని.. ప్రతి పౌరుడి ఆరోగ్యంపై దృష్టి సారించేలా హెల్త్​ ఐడీ జారీ చేస్తామని చెప్పారు మోదీ. ఇందుకోసం డిజిటల్​ హెల్త్​ మిషన్​ ప్రారంభిస్తున్నట్లు ప్రకటించారు. వైద్యరంగంలో ఇది విప్లవాత్మక మార్పులు తీసుకొస్తుందని వ్యాఖ్యానించారు.

కరోనా వ్యాక్సిన్​పై..

ప్రస్తుత క్లిష్ట పరిస్థితుల్లో కరోనాను ఎదుర్కొనేందుకు కేంద్ర, రాష్ట్ర ప్రభుత్వాలు ఏకమై పనిచేస్తున్నాయని అన్నారు ప్రధాని. అహర్నిశలు శ్రమిస్తున్న వైద్య సిబ్బందిని అభినందించారు. 

కరోనా వ్యాక్సిన్​ కోసం దేశమంతా ఆసక్తిగా ఎదురుచూస్తుందని చెప్పిన ప్రధాని.. తయారీ ప్రయత్నాలు వేగంగా సాగుతున్నాయన్నారు. దేశవ్యాప్తంగా 3 వ్యాక్సిన్​ క్యాండిడేట్లు వివిధ దశల్లో ప్రయోగాలు జరుపుకుంటున్నాయని స్పష్టం చేశారు. వీలైనంత త్వరగా ప్రతి ఒక్కరికీ వ్యాక్సిన్‌ అందించేందుకు ప్రయత్నం చేస్తున్నట్లు స్పష్టం చేశారు.

లద్దాఖ్​ గుణపాఠం..

తూర్పు లద్దాఖ్​లో జరిగింది ప్రపంచం చూసిందని.. సరిహద్దు దాటాలని ఎవరైనా ప్రయత్నం చేస్తే లద్దాఖ్​ గుణపాఠం గుర్తుంచుకోవాలని శత్రుదేశాలకు హెచ్చరికలు పంపారు.  

గడిచిన ఆరేళ్లలో ఎన్నో పథకాలు తీసుకొచ్చామని తెలిపిన మోదీ.. మధ్యతరగతి జీవితాన్ని మార్చినట్లు ఉద్ఘాటించారు.