విపక్షాల తీరు దురదృష్టకరం: కేంద్రం

పార్లమెంటు ఉభయ సభల సంయుక్త సమావేశాన్ని ఉద్దేశించి రాష్ట్రపతి శుక్రవారం చేసిన ప్రసంగాన్ని విపక్షాలు బహిష్కరించటంపై భాజపా తీవ్ర అభ్యంతరం వ్యక్తం చేసింది. ఈ ఘటనను 'దురదృష్టకరమైనది'గా అభివర్ణించింది. రాష్ట్రపతి పార్టీలకు అతీతమని స్పష్టం చేసింది.

పార్లమెంటు ఉభయ సభలను ఉద్దేశించి రాష్ట్రపతి చేసిన ప్రసంగాన్ని విపక్షాలు బహిష్కరించటాన్ని 'దురదృష్టకరమైన సంఘటన'గా భాజపా అభివర్ణించింది. "కాంగ్రెస్​ దురహంకార చర్యలు పెద్ద సమస్యగా మారుతున్నాయి" అని విమర్శించారు కేంద్ర మంత్రి రవిశంకర్​ ప్రసాద్​. భాజపా ఎప్పుడూ రాష్ట్రపతి ప్రసంగాన్ని బహిష్కరించలేదని గుర్తుచేశారు. దిల్లీ హింసను కాంగ్రెస్​ ఖండించకుండా జాతీయ పతాకాన్ని అవమానించిందన్నారు. రాష్ట్రపతి రామ్​నాధ్​ కోవింద్ ప్రసంగ సమయంలో కాంగ్రెస్​ ఎంపీ రవ్​నీత్​ సింగ్ బిట్టు నినాదాలు చేయటాన్ని తప్పుబట్టారు రవిశంకర్.

'అందుకే బహిష్కరించాం'

రాష్ట్రపతి ప్రసంగాన్ని బహిష్కరించినంత మాత్రాన ఆయన్ను అవమానించినట్లు కాదని కాంగ్రెస్ ఎంపీ అధీర్​ రంజన్ చౌదరీ స్పష్టం చేశారు. తాము రైతుల పక్షాల నిలబడ్డామని అన్నారు. కేంద్రం రైతు చట్టాలను రద్దు చేయలేదు కాబట్టే సభను బహిష్కరించామని తెలిపారు. రాష్ట్రపతి ప్రసంగానికి ధన్యవాదాలు తెలిపే సమయంలో దీనిపై చర్చిస్తామన్నారు.

ఇదీ చదవండి : రాష్ట్రపతి ప్రసంగాన్ని బహిష్కరించనున్న విపక్షాలు!