పుల్వామా దాడిలో 40 మంది వీర సైనికులను కోల్పోయిన భరతమాత కన్నీళ్లు దాయాది దేశంపై మిరాజ్లై బాంబుల వర్షం కురిపించాయి. ఉగ్ర స్థావరాలను తుత్తునియలు చేశాయి. 350 మంది ఉగ్రవాదులను మట్టిలో కలిపినట్లు సమాచారం. భారత పరాక్రమానికి పాక్ దగ్గర సమాధానం కరవైంది.
దీటుగా బదులిస్తామని చెప్పిన పాక్ అన్నంత పని చేసేందుకు విఫలయత్నం చేసింది. కశ్మీరులోని భారత సైనిక స్థావరాలపై ఎఫ్-16తో బాంబుల వర్షం కురిపించడానికి ప్రయత్నించి తోకముడిచింది. ప్రతిఘటించే సమయంలో భారత మిగ్-21 నేలకూలింది.
తప్పించుకుని నియంత్రణ రేఖ ఆవల పడిన భారత పైలట్ అభినందన్ను దాయాది దేశం బంధించింది. దౌత్య ఒత్తిడికి ఎట్టకేలకు ఇమ్రాన్ సర్కారు తలొగ్గక తప్పలేదు. భారత పైలట్ సగర్వంగా స్వదేశంలో కాలుమోపారు. పైకి నీతి వ్యాఖ్యలు వల్లిస్తూ వెనుక కుట్రలు పన్నే అలవాటున్న పాక్ ఈ పరిణామాల దృష్ట్యా ఎలా వ్యవహరిస్తుందనే విషయాన్ని ప్రపంచ దేశాలు నిశితంగా పరిశీలిస్తున్నాయి.
యుద్ధం మా అభిలాష కాదు అని దాయాది దేశం చెప్పుకొస్తుంది. అయితే సరిహద్దులో కవ్వింపులకు పాల్పడుతూనే ఉంది. భారత్ ప్రతిసారి దీటుగా బదులిస్తోంది. ప్రస్తుతం యద్ధానికి తెరలేపే అంతటి దుస్సాహసానికి పాక్ పాల్పడకపోవచ్చు. యుద్ధమే వస్తే గెలుపు మాట అటుంచి శత్రుదేశానికి నిలిచే శక్తి కూడా లేదు. కనుక ఎప్పటిలానే జిహాదీలను అడ్డుపెట్టుకొని తెర వెనుక తతంగం నడిపిస్తుందా?
ఈ పరిణామాల దృష్ట్యా ఇరు దేశాలు సైనిక బలం, ఆయుధ సామగ్రి వంటివి చర్చనీయాంశమయ్యాయి. యుద్ధమే వస్తే అసలు ఎవరి బలం ఎంత? ఒక దేశం పరాక్రమానికి దోహదం చేయడంలో కీలకమైనదిగా భావించే కొన్ని అంశాలను పరిశీలిద్దాం.
గ్లోబల్ ఫైర్ పవర్-జీఎఫ్పీ అనే సంస్థ 136 దేశాలకు సంబంధించిన 55 అంశాలను పరిగణనలోకి తీసుకొని సైనిక శక్తి ఎంత అనే దానిపై ర్యాంకులు, రేటింగ్ ఇచ్చింది.
అమెరికా-'1'..భారత్-'4'
ఈ ర్యాంకింగ్స్లో అగ్రరాజ్యం అమెరికా 0.018 రేటింగ్తో మొదటి స్థానంలో ఉంది. తరువాత రష్యా, చైనా. 0.1417 రేటింగ్తో భారత్ది 4వ స్థానం. 0.3689 రేటింగ్తో పాక్ది 17వ స్థానం.
ఏ ప్రాతిపదికన..?
* దేశంలో ఉన్న ఆయుధ సామగ్రి
* సైన్యం శక్తి సామర్థ్యాలు
* రక్షణ బడ్జెట్
* అణ్వాయుధాలు, వాటిని ప్రయోగించడానికి వీలైన ప్రదేశాలు
* రాజకీయ నాయకత్వం, నిర్ణయాధికారం
ఈ అంశాలన్నీ పరిగణనలోకి తీసుకుంటే ప్రపంచంలోనే అత్యంత శక్తిమంతమైన సైన్యం ఉన్న దేశంగా అగ్రరాజ్యం అమెరికా మొదటి స్థానంలో ఉంది.
సైనికుల సంఖ్యలో...
సైనిక బలం, ఆయుధాలు, యుద్ధ విమానాలు వంటి అంశాల్లో అమెరికా అగ్రస్థానంలో ఉంది. దాదాపు 21 లక్షల సైన్యంతో మొదటి స్థానంలో చైనా ఉంది. దాదాపు 13 లక్షల సైన్యంతో రెండో స్థానంలో భారత్ నిలిచింది.
దృఢమైన సైనికులు...
దృఢమైన సైనికులు కలిగిన దేశాలలో చైనాది అగ్రస్థానం. తరువాతి స్థానంలో భారత్ ఉంది. అమెరికాది మూడో స్థానం.
5 ముఖ్య దేశాలు-5 విభిన్న సేనలు
క్రియాశీలక సైన్యం, యుద్ధ విమానాలు, సైనిక హెలికాప్టర్లు, యుద్ధ ట్యాంకులు, సాయుధ నౌకలు, అణ్వాయుధాలు, రక్షణ బడ్జెట్ ఇలా విభిన్న అంశాల్లో అమెరికా, రష్యా, చైనా, భారత్, పాకిస్థాన్ మిగిలిన దేశాల కన్నా చాలా శక్తిమంతమైనవి. భూమి, ఆకాశం, నీరు ఇలా ఎక్కడైనా యుద్ధం చేయడానికి ఈ దేశాలకున్న సామర్థ్యం చాలా ఎక్కువ.
| భారత్ | పాకిస్థాన్ | |
| సైనిక బలం | 13,62,500 | 6,37,000 |
| యుద్ధ విమానాలు | 2185 | 1281 |
| సైనిక హెలికాఫ్టర్లు | 720 | 328 |
| యుద్ధ ట్యాంకులు | 4426 | 2182 |
| సాయుధ నౌకలు | 295 | 197 |
| అణ్వాయుధాలు | 135 | 145 |
| రక్షణ బడ్జెట్ (లక్షల కోట్లలో) | 3.05 | 1 |
భారత్, పాకిస్థాన్ అణ్వాయుధాలు కలిగిన దేశాలు. పాకిస్థాన్ ఎప్పటికప్పుడు అణ్వాయుధాల విషయంలో నాటకీయంగా వ్యవహరిస్తోంది. అణ్వాయుధాలను వినియోగించాల్సిన అవసరం ఇప్పటివరకు భారత్కు రాలేదు. అది ప్రస్తుత పరిణామాల ప్రభావంతో తీసుకునే నిర్ణయంపై ఆధారపడి ఉంటుంది.
