గతేడాది కంటే ఈ ఏడాది దీపావళికి.. దిల్లీ కాలుష్యం మరింత పెరిగిందని కేంద్ర కాలుష్య నియంత్రణ మండలి(సీపీసీబీ) స్పష్టం చేసింది. వాతావరణ మార్పుల వల్ల, చుట్టు పక్కల రాష్ట్రాల్లో.. వ్యవసాయ వ్యర్థాల దహనం వల్ల వాయు కాలుష్యం తీవ్ర స్థాయికి చేరినట్లు పేర్కొంది.
ఈ మేరకు. .కాలుష్య వివరాలకు సంబంధించి ఓ నివేదికని సమర్పించింది కేంద్ర కాలుష్య నియంత్రణ మండలి. గతేడాది వ్యవసాయ వ్యర్థాల దహనం వల్ల 19 శాతం కాలుష్యం నమోదైందని తెలిపింది. ఈ ఏడాది అది 32 శాతంగా ఉన్నట్లు వెల్లడించింది.
"ఈ ఏడాది దీపావళి పండగ నవంబర్ మధ్యకాలంలో రావడం వల్ల వాతావరణ మార్పు ప్రభావం కాలుష్యంపై మరింతగా ఉంది. గతేడాది .. అక్టోబర్ చివరి వారంలో పండగ జరగడం వల్ల ఈ తీవ్రత కాస్త స్వల్పంగా ఉంది" అని నివేదికలో పేర్కొంది సీపీసీబీ.
గత నాలుగేళ్లలో ఈరోజే తీవ్రంగా!...
దీపావళి పండగ తర్వాత రోజు వాయు కాలుష్యం నమోదు శాతం పరిశీలిస్తే.. ఈ ఏడాది కాలుష్యం మరింత పెరిగింది. గత నాలుగేళ్లలో ఇదే అత్యధికం కావడం గమనార్హం.
ఒకే రోజు 2000 కాల్స్..
నవంబర్ 30 వరకు దిల్లీలో బాణసంచా వినియోగాన్ని నిషేధించింది హరిత ట్రైబ్యునల్. కానీ, పండగ రోజు.. తమ ప్రాంతంలో పటాకులు కాల్చుతున్నారంటూ దిల్లీ పోలీసులకు దాదాపు 2000 ఫోన్ కాల్స్ వచ్చాయి. ఈ విషయాన్ని ఓ సీనియర్ పోలీసు అధికారి వెల్లడించారు.
దీపావళి రోజు 850 మందిని అరెస్టు చేశామని, 1314.42 కిలోల బాణసంచాను సీజ్ చేశామని ఓ పోలీసు అధికారి పేర్కొన్నారు.
ఇదీ చదవండి:ముంబయిలో టపాసుల మోత 'మోగలేదు'
