మహారాష్ట్ర, హరియాణా శాసనసభ ఎన్నికల్లో ప్రజల తీర్పుతో భాజపా నైతికంగా ఓడిపోయిందని కాంగ్రెస్ విమర్శించింది.
హరియాణాలో భాజపా విజయం సాధించిందని అమిత్ షా ప్రకటించుకున్నంత మాత్రాన మెజారిటీ సాధించలేరన్నారు కాంగ్రెస్ సీనియర్ నేత ఆనంద్ శర్మ. ఓట్ల శాతం కాషాయ పార్టీకి గణనీయంగా తగ్గిందన్నారు. హరియాణాలో ప్రజల తీర్పు... భాజపాపై వ్యతిరేకతను ప్రతిబింబిస్తుందన్నారు. భాజపాను ఎదుర్కొనేందుకు అన్ని పార్టీలు కలిసిరావాలని కోరారు ఆనంద్ శర్మ.
ఈ ఎన్నికల్లో హరియాణాలో కాంగ్రెస్ పుంజుకుంది. 2014లో 15 స్థానాలే నెగ్గిన హస్తం పార్టీ ఈ సారి 31 చోట్ల విజయం సాధించింది. ప్రభుత్వ ఏర్పాటుకు 46 స్థానాలు అవసరం కాగా... అతిపెద్ద పార్టీగా అవతరించిన భాజపా 40 స్థానాలకే పరిమితమైంది.
మహారాష్ట్రలో భాజపా-శివసేన కూటమికి సాధారణ మెజార్టీ వచ్చినప్పటికీ క్రితం సారి కంటే స్థానాలు తగ్గాయి. 2014లో 122 చోట్ల నెగ్గిన కాషాయ పార్టీ దాదాపు 20 స్థానాలు కోల్పోయింది. కాంగ్రెస్-ఎన్సీపీలు... భాజపా-సేన కూటమికి గట్టి పోటీ ఇచ్చాయి.
