కనీస మౌలిక వసతులు లేని పలు గ్రామీణ పాఠశాలల్లో సార్వత్రిక ఎన్నికల పుణ్యాన సమస్యలు తీరాయి. అప్పటి వరకూ లేని తాగునీరు, విద్యుత్ సౌకర్యం ఎన్నికల దెబ్బకు చిటికెలో వచ్చేశాయి. ఎన్నికలేంటి... ఈ సౌకర్యాలేంటి.. అసలు వీటికి ఏం సంబంధం అని సందేహం కలిగిందా? ఇంతకీ విషయం ఏంటంటే...
మధ్యప్రదేశ్లో..
2019 సార్వత్రిక ఎన్నికల వల్ల మధ్యప్రదేశ్ గ్రామీణ ప్రాంతాల్లోని సుమారు 15,000 పాఠశాలలకు శాశ్వత విద్యుత్తు సౌకర్యం కలిగింది. ఈ విషయాన్ని ఆ రాష్ట్ర ప్రధాన ఎన్నికల అధికారి (సీఈవో) అధికారిక నివేదిక స్పష్టం చేస్తోంది.
ఎన్నికల నిర్వహణ కోసం గ్రామీణ పాఠశాలలను పోలింగ్ కేంద్రాలుగా మార్చారు. మధ్యప్రదేశ్లోని జబువా, రత్లాం, బేతుల్, బింఢ్ లాంటి గ్రామీణ ప్రాంత పాఠశాలలను మొదటిసారిగా పోలింగ్ కేంద్రాలుగా వినియోగించారు.
ఈ పాఠశాలల్లో కనీస వసతులు లేవు. ఈవీఎమ్లు, వీవీప్యాట్లు అలాగే ఇతర ఎన్నికల సామగ్రి పనిచేయడం కోసం విద్యుత్తు తప్పనిసరి. అందుకోసం ఈ పాఠశాలలకు విద్యుత్ సౌకర్యం కల్పించారు. మరికొన్ని విద్యాలయాల్లో భవన మరమ్మత్తులు చేశారు. మంచి నీటి వసతులూ సమకూర్చారు. ఆ విధంగా ఎన్నికలను ఎలాంటి ఆటంకం లేకుండా నిర్వహించినట్లు ఎన్నికల ప్రధాన అధికారి వెల్లడించిన నివేదిక స్పష్టం చేసింది.
బిహార్లోనూ...
ఎన్నికల నిర్వహణ వల్ల బిహార్లోని గ్రామీణ పాఠశాలలూ లబ్ధి పొందాయని బిహార్ సీఈవో నివేదిక తెలిపింది. ఎన్నికల పుణ్యమా అని శిథిలమైన పైకప్పులు, గోడలు గల సుమారు ఓ డజను పాఠశాలలు మరమ్మతులకు నోచుకున్నాయి. వాటికి రంగులు కూడా వేశారు. వీటితోపాటు ఫ్యాన్లు, బల్బులు తదితరాలనూ అమర్చారని సీఈవో నివేదిక స్పష్టం చేసింది.
ఇదీ చూడండి: మోదీకి పాక్ ప్రధాని ఇమ్రాన్ ఖాన్ ఫోన్
