'నన్నే జైలుకు పంపుతానని దీదీ బెదిరింపు'

బంగాల్​ మధురాపుర్​లో జరిగిన ఎన్నికల ర్యాలీలో మమతా బెనర్జీపై ప్రధాని నరేంద్ర మోదీ విరుచుకుపడ్డారు. విద్యాసాగర్​ విగ్రహాన్ని ధ్వంసం చేసి... ఇప్పుడు పోలీసుల చేత సాక్ష్యాలు మాయం చేయిస్తున్నారని ఆరోపించారు. ఎన్నికల అనంతరం తనను జైలుకు పంపుతానని దీదీ బెదిరిస్తున్నట్లు వ్యాఖ్యానించారు మోదీ.

ఎన్నికల చివరి అంకంలో భాజపా, తృణమూల్​ కాంగ్రెస్​ మధ్య మాటల యుద్ధం తారస్థాయికి చేరుకుంది. బంగాల్​ మధురాపుర్​లో జరిగిన ఎన్నికల ర్యాలీలో టీఎంసీ అధినేత్రి మమతా బెనర్జీపై ప్రధాని నరేంద్ర మోదీ తీవ్ర స్థాయిలో ధ్వజమెత్తారు. ఓటమి భయంతో దీదీ బెదిరింపులకు దిగుతున్నారని ఆరోపించారు.

"దీదీ.. బంగాల్​ను తన జాగీరుగా భావిస్తున్నారు. టీఎంసీ గూండాలు బీభత్సం సృష్టించారు. రాత్రివేళ గొప్ప సామాజికవేత్త ఈశ్వర్‌ చంద్‌ విద్యాసాగర్‌ విగ్రహాన్ని ధ్వంసం చేశారు. ఆ కళాశాలలో సీసీ కెమెరాలు ఉన్నాయి. ఏ విధంగానైతే శారద, నారద కుంభకోణాల్లో సాక్ష్యాలు మాయం చేశారో.... ఇప్పుడూ అదే ప్రయత్నం చేస్తున్నారు. ఓటమి భయంతో దీదీ వణికిపోతున్నారు. బెదిరింపులకు దిగుతున్నారు. ఈ రోజు ఉదయం... నన్ను జైలుకు పంపిస్తానని బెదిరించారు. నిన్న మీడియాలో చూశా భాజపా కార్యాలయాన్నే కబ్జా చేస్తానని దీదీ బెదిరిస్తున్నారు."
- నరేంద్ర మోదీ, ప్రధాన మంత్రి

ఇదీ చూడండి 'బంగాల్​లో 324 ఈసీ మోదీకిచ్చిన బహుమతి'