కరోనాను నియంత్రించేందుకు కఠిన నిర్ణయాలు తీసుకోవాల్సి వచ్చిందన్నారు ప్రధాని నరేంద్ర మోదీ. వైరస్ కట్టడికి కేంద్రం అన్ని చర్యలు తీసుకుంటోందన్న ఆయన.. అన్ని రాష్ట్రాల సహకారం వల్లే ఇది సాధ్యమవుతుందని ఉద్ఘాటించారు. భాజపా 40వ వ్యవస్థాపక దినోత్సవం సందర్భంగా కార్యకర్తలను ఉద్దేశించి ప్రసంగించిన మోదీ ఈ వ్యాఖ్యలు చేశారు. పార్టీ కార్యకర్తలంతా తమ కర్తవ్యాన్ని నిర్వర్తించాలని కోరారు ప్రధాని.
''కరోనాను తరిమికొట్టేందుకు అందరం ఒక్కటవుదాం. అంతిమయుద్దంలో విజయం మనదే. 130 కోట్ల మంది ప్రజలు.. పరిణతితో వ్యవహరించారు. నిన్న రాత్రి 9 గంటలకు అది స్పష్టంగా కనిపించింది. క్లిష్ట సమయాల్లో ఎలా మెలగాలో ప్రపంచదేశాలకు భారత్ ఆదర్శంగా నిలిచింది. భారత్ తీసుకుంటున్న చర్యలను డబ్ల్యూహెచ్ఓ ప్రశంసించింది. లాక్డౌన్ సమయంలో ప్రజలంతా సహకరించాలి.''
- నరేంద్ర మోదీ, భారత ప్రధాన మంత్రి
భారత్ సహా ప్రపంచమంతా కష్టకాలంలో ఉన్నప్పుడు భాజపా ఈ సారి వ్యవస్థాపక దినోత్సవం జరుపుకోవాల్సి వస్తుందని వ్యాఖ్యానించారు మోదీ.
కరోనా వైరస్ మహమ్మారిపై సుదీర్ఘ యుద్ధం చేయాల్సి ఉందన్నారు ప్రధాని. విశ్రాంతి లేకుండా పోరాడాలని పిలుపునిచ్చారు. దేశానికి ప్రస్తుతం ఒకే లక్ష్యం-ఒకే సంకల్పం ఉందని.. అది కరోనాపై విజయం సాధించడమేనన్నారు.
మోదీ సూచనలు..
- ప్రభుత్వం రూపొందించిన ఆరోగ్య సేతు యాప్ను ఇన్స్టాల్ చేసుకోండి. ఒక్కొక్కరు మరో 40 మందిని అలా చేయమని ప్రోత్సహించండి. మీ చుట్టుపక్కల కరోనా కేసుల గురించి ఇందులో సమాచారం ఉంటుంది.
- సామాజిక దూరం, క్రమశిక్షణ పాటించండి.
- ఇంటాబయట ఫేస్ మాస్కులు ధరించండి.
- గతంలో యుద్ధసమయాల్లో మన తల్లులు, చెల్లెలు బంగారం విరాళంగా ఇచ్చారు. ఇప్పుడు కూడా దాదాపు అదే పరిస్థితి నెలకొంది. కానీ ఇది మానవత్వాన్ని కాపాడే యుద్దం. ఈ సందర్భంగా ప్రతి భాజపా కార్యకర్త.. పీఎం కేర్స్ నిధికి విరాళాలు ఇవ్వమని అభ్యర్థిస్తున్నా. ఇలా చేసేలా మరో 40 మందిని ప్రోత్సహించండి.
