అమెరికా సహా భారత్లోనూ కరోనా విశ్వరూపం చూపిస్తున్న నేపథ్యంలో ఇరుదేశాధినేతలు ఒక్కతాటిపైకి చేరారు. రెండు దేశాలు సహాయసహకారాలు ఇచ్చిపుచ్చుకుంటూ ముందుకు సాగాలని తీర్మానించారు. ఈ మేరకు అమెరికా అధ్యక్షుడు డొనాల్డ్ ట్రంప్, భారత ప్రధానమంత్రి నరేంద్ర మోదీ ఫోన్లో సంభాషించుకున్నారు.
ఈ విషయన్ని ప్రధాని ట్విట్టర్ వేదికగా వెల్లడించారు.
"అధ్యక్షుడు డొనాల్డ్ ట్రంప్తో ఫోన్లో విస్తృత చర్చలు జరిగాయి. కరోనా వైరస్పై పోరాడేందుకు భారత్-అమెరికా భాగస్వామ్య పూర్తి శక్తి సామర్థ్యాలను వినియోగించడానికి అంగీకరించాం."-నరేంద్ర మోదీ, భారత ప్రధానమంత్రి
భారత్లో వైరస్ కేసులు ఇప్పుడిప్పుడే తీవ్రమవుతుండగా.. అమెరికాలో కరోనా విధ్వంసం సృష్టిస్తోంది. ప్రపంచంలో అత్యధిక కేసులు ఆ దేశంలోనే నమోదయ్యాయి. అమెరికాలో ఇప్పటివరకు 2,78,458 పాజిటివ్ కేసులు నిర్ధరించారు అధికారులు. 7100 మందికి పైగా వైరస్ ధాటికి బలయ్యారు.
