ప్రధానమంత్రి నరేంద్ర మోదీ ఇవాళ సాయంత్రం 4 గంటలకు జాతిని ఉద్దేశించి ప్రసంగించనున్నారు. కరోనా సంక్షోభం, చైనాతో సరిహద్దు ఉద్రిక్తతలు కొనసాగుతున్న వేళ మోదీ ప్రసంగంపై సర్వత్రా ఉత్కంఠ నెలకొంది.
"మంగవారం సాయంత్రం 4 గంటలకు ప్రధాని నరేంద్ర మోదీ దేశాన్ని ఉద్దేశించి ప్రసంగిస్తారు." - ప్రధానమంత్రి కార్యాలయం
జులై 1 నుంచి దేశంలో అన్లాక్ 2.0 ప్రారంభం కానుంది. దీని కోసం సోమవారం రాత్రి కేంద్ర హోంమంత్రిత్వశాఖ కీలక మార్గదర్శకాలు జారీ చేసింది. లాక్డౌన్ ఆంక్షలను మరింత సడలించి, మరిన్ని ఆర్థిక కార్యకలాపాలకు దశలవారీగా అనుమతిస్తున్నట్లు పేర్కొంది. దీనిపై కూడా మోదీ ప్రసంగించే అవకాశముంది.
ఆరో ప్రసంగం
కరోనా సంక్షోభం మొదలైనప్పటి నుంచి ఇప్పటి వరకు ప్రధాని మోదీ జాతిని ఉద్దేశించి 5 సార్లు ప్రసంగించారు. తాజాది ఆరో ప్రసంగం అవుతుంది.
- మార్చి 19న ప్రధాని మోదీ తన ప్రసంగంలో... మార్చి 22న 'జనతా కర్ఫ్యూ' పాటించాలని విజ్ఞప్తి చేశారు.
- మార్చి 24న ... దేశవ్యాప్తంగా 21 రోజుల పాటు లాక్డౌన్ ప్రకటించారు. ఏప్రిల్ 14న ఈ లాక్డౌన్ వ్యవధిని మే 3 వరకు పొడిగించారు.
- ఏప్రిల్ 3న ఇచ్చిన వీడియో సందేశంలో... ఏప్రిల్ 5న కరోనాతో పోరాడుతున్న యోధుల (ఆరోగ్య సిబ్బంది, పోలీసులు, పారిశుద్ధ్య కార్మికులు) కోసం దీపాలను వెలిగించాలని ప్రజలను అభ్యర్థించారు.
- మోదీ చివరిసారి (ఐదో సారి) జాతినిద్దేశించి చేసిన ప్రసంగంలో... కరోనా సంక్షోభం, లాక్డౌన్ వల్ల దెబ్బతిన్న ఆర్థిక వ్యవస్థను పునరుద్ధరించేందుకు రూ.20 లక్షల కోట్ల ఉద్దీపన ప్యాకేజీని ప్రకటించారు.
మనసులో మాట
మోదీ తన తాజా 'మన్కీ బాత్' కార్యక్రమంలో... తూర్పు లద్దాఖ్ ప్రాంతాన్ని ఆక్రమించడానికి ప్రయత్నిస్తున్న శత్రుదేశానికి భారత్ తగిన సమాధానం ఇచ్చిందని పేర్కొన్నారు. అలాగే అన్లాక్ దశలో ప్రజలు మరింత అప్రమత్తంగా ఉండాలని, అవసరమైన జాగ్రత్తలు తీసుకోవాలని సూచించారు.
ఇటీవల ముఖ్యమంత్రులతో నిర్వహించిన సమావేశంలో.. దెబ్బతిన్న దేశ ఆర్థిక వ్యవస్థను పునరుద్ధరించేందుకు... అన్లాక్ 2.0 దశ గురించి ఆలోచించాలని ప్రధాని మోదీ విజ్ఞప్తి చేశారు.
ఇదీ చూడండి: హిందూ మహా సముద్రంలో నిఘా పెంచిన భారత్
