సీఎంలతో శనివారం మోదీ భేటీ- లాక్​డౌన్​పై నిర్ణయం!

దేశంలో కరోనా మహమ్మారి విస్తరిస్తున్న నేపథ్యంలో ఈనెల 11న సీఎంలతో వీడియో కాన్ఫరెన్స్​ నిర్వహించనున్నారు ప్రధాని నరేంద్ర మోదీ. లాక్​డౌన్​ పొడగించాలా? వద్దా అనే అంశంపై వారి అభిప్రాయాలు తెలుసుకోనున్నట్లు సమాచారం.

దేశంలో కరోనా కేసులు పెరుగుతున్న నేపథ్యంలో లాక్​డౌన్​ కొనసాగింపుపై తీవ్ర తర్జనభర్జన పడుతోంది కేంద్ర ప్రభుత్వం. రాష్ట్రాల ముఖ్యమంత్రులతో ఇప్పటికే రెండు సార్లు వీడియో కాన్ఫరెన్స్​ నిర్వహించిన ప్రధానమంత్రి నరేంద్ర మోదీ.. ఈనెల 11న మరోమారు వారితో సమావేశం కానున్నారు. కేసుల సంఖ్యలో పెరుగుదల, లాక్​డౌన్​ కొనసాగింపుపై చర్చించనున్నారు.

21 రోజుల పాటు విధించిన లాక్​డౌన్​ ఈనెల 14న ముగియనుంది. అయితే లాక్​డౌన్​ను పొడిగించాలా? వద్దా అనే విషయంపై ముఖ్యమంత్రులతో చర్చించి తదుపరి నిర్ణయం తీసుకోనున్నట్లు సమాచారం. ఇప్పటికే పలు రాష్ట్రాల సీఎంలు లాక్​డౌన్​ పొడిగిస్తేనే మంచిదని అభిప్రాయం వ్యక్తం చేస్తున్నారు. ఈ నేపథ్యంలో 11న జరిగే సమావేశంపై సర్వత్రా ఆసక్తి నెలకొంది.

ఇదీ చూడండి: 'ప్రతి ప్రాణం విలువైందే.. యుద్ధ ప్రాతిపదికన పనిచేయండి'