'దేశాభివృద్ధికి శాంతి, సామరస్యం అవసరం'

దిల్లీ అల్లర్లపై పార్లమెంట్​లో గందరగోళ పరిస్థితులు నెలకొన్న నేపథ్యంలో భాజపా ఎంపీలు సమావేశమయ్యారు. సమాజంలో శాంతి, సామర్యం అవసరం అన్నారు ప్రధానమంత్రి నరేంద్ర మోదీ. అవి దేశాభివృద్ధికి ఎంతో దోహదపడుతాయన్నారు.

దిల్లీ అల్లర్లపై పార్లమెంట్​లో సోమవారం దుమారం చెలరేగిన నేపథ్యంలో అనుసరించాల్సిన వ్యూహాలపై భాజపా పార్లమెంటరీ పార్టీ భేటీ అయింది. ప్రధాని నరేంద్ర మోదీ నేతృత్వం వహించారు. దేశంలో శాంతి, సామరస్య స్థాపనకు ఎంపీలు ముందుండాలన్నారు మోదీ. అవి దేశాభివృద్ధికి ఉపయోగపడుతాయన్నారు. భారత్​ మాతా కీ జై నినాదం చుట్టూ వివాదం సృష్టించే ప్రయత్నాలు జరుగుతున్నాయని మోదీ ఆక్షేపించారు. 'భారత్​ మాతా కీ జై' నినాదం దుర్వినియోగం అవుతుందన్న మాజీ ప్రధాని మన్మోహన్‌సింగ్‌ వ్యాఖ్యలను ఖండించిన మోదీ... కొంతమంది ఈ నినాదంలోనూ చెడును వెతుకుతున్నారని పరోక్షంగా విమర్శించారు.

కొన్ని పార్టీలకు రాజకీయ ప్రయోజనాలే ముఖ్యమని, భాజపాకు జాతీయ ప్రయోజనాల తర్వాతే ఏదైనా అని అన్నారు ప్రధాని. దిల్లీ హింస విషయంలో తమ ప్రభుత్వంపై బురద జల్లేందుకు ప్రతిపక్షాలు యత్నిస్తున్నాయన్నారు.

ఇదీ చూడండి: దిల్లీ అల్లర్లపై దుమారం.. రాజ్యసభ రెండుగంటలకు వాయిదా