సిక్కుల ఆధ్యాత్మిక కేంద్రం దర్బార్ సాహిబ్ గురుద్వారాను పునఃప్రారంభించింది పాకిస్థాన్. అయితే అక్కడికి యాత్రికులు వెళ్లేందుకు కేంద్రం అనుమతించని నేపథ్యంలో భారత పౌరుడెవరూ ఆధ్యాత్మిక క్షేత్రాన్ని సందర్శించలేదని భారత పవిత్ర స్థలాల ట్రస్ట్ ఓ ప్రకటన విడుదల చేసింది. ఈ పవిత్ర స్థలానికి వెళ్లేందుకు చేసే రిజిస్ట్రేషన్ల ప్రక్రియను మార్చి 16న కరోనా విజృంభణ నేపథ్యంలో నిలిపేసింది భారత్.
"కర్తార్పుర్ కారిడార్ను సోమవారం పాక్ పునఃప్రారంభించింది. అయితే భారత్ నుంచి భక్తులెవరూ అక్కడికి వెళ్లలేదు. భారత్, పాకిస్థాన్ నుంచి యాత్రకు వెళ్లాలనుకునే భక్తులు భౌతిక దూరం నిబంధనలను పాటిస్తూ పర్యటించాల్సి ఉంటుంది. భారత పవిత్ర స్థలాల ట్రస్ట్, పాక్ సిక్ గురుద్వారా ప్రబంధక్ కమిటీ ఇందుకోసం ప్రత్యేక ఏర్పాట్లు, రక్షణ చర్యలు చేపడతాయి."
-ఇమ్రాన్ఖాన్, భారత పవిత్ర స్థలాల ట్రస్ట్ డిప్యూటీ డైరెక్టర్
కర్తార్పుర్ కారిడార్ను పునఃప్రారంభించే అంశమై అంతకుముందు పాక్ విదేశాంగ మంత్రి షా మహమూద్ ఖురేషి ప్రకటన విడుదల చేశారు. రెండు రోజుల ముందు కారిడార్ను తెరుస్తున్నట్లు చెప్పారు.
భారత్ అభ్యంతరం..
అయితే పాక్ ప్రకటనపై భారత్ భిన్నంగా స్పందించింది. భారత్తో సత్సంబంధాలను నెలకొల్పేందుకే పాక్ కారిడార్ పునరుద్ధరణ అంశాన్ని ముందుకు తెచ్చిందని.. ఆరోగ్య శాఖ, అవసరమైన ఇతర శాఖలతో సంప్రదించిన అనంతరమే భారత వైఖరి ప్రకటిస్తామని వెల్లడించింది. పాక్ పునరుద్ధరణ నిర్ణయం పైనా ఆశ్చర్యం వ్యక్తం చేసింది భారత్. పాక్ ప్రతిపాదన మంచితనాన్ని చాటుకునే యత్నమని విమర్శించింది. కర్తార్పుర్ నడవా ఒప్పందం ప్రకారం ఏడు రోజుల ముందు కారిడార్ను తెరుస్తున్నట్లు సమాచారం ఇవ్వాలని.. కానీ తక్కువ వ్యవధితో పునఃప్రారంభంపై సమాచారం ఇవ్వడం సరికాదని పేర్కొంది.
గతేడాది నవంబర్లో..
సిక్కు మత వ్యవస్థాపకుడు గురునానక్ దేవ్ 550వ జయంతి సందర్భంగా గతేడాది నవంబర్లో కర్తార్పుర్ నడవా ప్రారంభమైంది.
సిక్కు మత స్థాపకుడు గురునానక్ దేవ్ తన జీవిత చరమాంకాన్ని కర్తార్పుర్లోనే గడిపినట్లు భక్తులు విశ్వసిస్తారు. 18ఏళ్ల పాటు గురునానక్ ఈ ప్రాంతంలో జీవించారు. భారత్లోని అన్ని మతాల ప్రజలకు ఈ చారిత్రక గురుద్వారాను సందర్శించుకోవడానికి అనుమతి ఉంటుంది.
ఇదీ చూడండి: 'కర్తార్పుర్ నడవా పునరుద్ధరణ పాక్ కపట నాటకమే!'
