భారత్, యూకేలు సంయుక్తంగా తయారు చేస్తోన్న కొవిడ్ టీకా 'కొవిషీల్డ్'కు వచ్చే వారంలో అత్యవసర వినియోగ అనుమతులు రానున్నాయి. జనవరిలో వ్యాక్సిన్ విడుదలకు సన్నాహాలు జరుగుతున్నాయి. ఈ నేపథ్యంలో.. భారత ఔషధ నియంత్రణ సంస్థ(డీసీజీఐ) బ్రిటన్ అనుమతి కోసం ఎదురుచూస్తోంది.
యూకే అంగీకరిస్తే టీకాపై తీసుకొనే తదుపరి చర్యల గురించి భారత్లోని నిపుణుల కమిటీ సమావేశం కానుంది. వ్యాక్సిన్ సమర్థత, క్లినికల్ ట్రయల్స్ గురించి చర్చించనుంది.
కొవిషీల్డే మొదటిదా?
భారత్ బయోటెక్ తయారు చేస్తున్న 'కొవాగ్జిన్' టీకా తుది దశ క్లినికల్ ప్రయోగాలు పూర్తి కానందున అత్యవసర వినియోగ అనుమతికి ఇంకాస్త సమయం పట్టొచ్చు. మరోవైపు ఫైజర్కు అత్యవసర వినియోగం ఆమోదం రాలేదు. దీంతో కొవిషీల్డ్ టీకాయే భారత్లో ముందుగా వినియోగంలోకి వచ్చే అవకాశముంది.
దేశంలో తయారవుతోన్న టీకాలకు అత్యవసర ఆమోదం తెలుపాల్సిందిగా.. భారత్ బయోటెక్, సీరం ఇనిస్టిట్యూట్, ఫైజర్ సంస్థలు డీసీజీఐకి దరఖాస్తు చేసుకున్నాయి. వీటిని పరిశీలించిన నిపుణుల కమిటీ.. టీకా అదనపు రక్షణ, సమర్థత తదితర అంశాలపై మరింత సమాచారం కావాలని డిసెంబర్ 9నాటి సమావేశంలో కోరింది. అందుకు మరికొంత సమయం కావాలని ఫైజర్ సంస్థ కోరడంతో, దాని దరఖాస్తును లెక్కలోకి తీసుకోలేదు. అయితే ఫైజర్ టీకాకు ఇప్పటికే యూకే, అమెరికా, బహ్రెయిన్లు ఆమోదం తెలిపాయి.
సీరం ఇనిస్టిట్యూట్ దరఖాస్తును పరిశీలించిన కమిటీ.. రెండు, మూడు దశల్లో టీకా సమర్థత, రక్షణ తదితర అంశాలపై సమాచారాన్ని కోరింది. యూకేలోనూ దాని ఫలితాలు ఎలా ఉన్నాయనే విషయాలను యూకే మెడిసిన్స్ అండ్ హెల్త్కేర్ ప్రొడక్ట్స్ రెగ్యులేటరీ ఏజెన్సీని అడిగింది.
ఇదీ చదవండి: 'కొవిషీల్డ్'కు ముందుగా మనదేశంలోనే అనుమతి!
