దేశంలో పెరుగుతున్న రైల్వే ప్రయాణికుల అవసరాలను ఆ శాఖ తీర్చేలేకపోతోందన్న చేదు నిజం మరోసారి బయట పడింది. టికెట్‌ కొన్నా చాలా మంది ప్రయాణానికి దూరమవుతున్నారన్న విషయం ఓ ఆర్‌టీఐ దరఖాస్తు ద్వారా వెల్లడైంది. ఒక్క 2019-2020 ఏడాదిలోనే ఇలా కోటి మందికి పైగా ప్రజలు రైల్వే ప్రయాణానికి దూరమయ్యారని తేలింది. వెయిటింగ్ లిస్ట్ ఉండే టికెట్లు ఆటోమేటిక్గా రద్దు కావడమే ఇందుకు కారణం. ఈ విధంగా 2019-2020లో మొత్తం 84,61,204 ప్యాసింజర్‌ నేమ్‌ రికార్డు (పీఎన్ఆర్) నంబర్లు కలిగిన 1.25 కోట్ల మంది ప్రయాణానికి దూరమయ్యారని తేలింది. మధ్యప్రదేశ్‌కు చెందిన ఆర్‌టీఐ కార్యకర్త చంద్రశేఖర్‌ గౌర్‌ దాఖలు చేసిన దరఖాస్తు ద్వారా ఈ విషయం వెలుగులోకి వచ్చింది.
ఐదేళ్లలో 5 కోట్లు
వెయిట్లిస్ట్ కారణంగా ఐదేళ్లలో సుమారు 5కోట్ల పీఎన్ఆర్లు ఆటోమేటిక్గా రద్దైనట్టు తెలిపింది రైల్వేశాఖ. 2014-15లో 1.13కోట్లు; 2015-16లో 81.05 లక్షలు; 2016-17లో 72.13 లక్షలు; 2017-18లో 73.02 లక్షలు; 2018-19లో 68.97 లక్షల పీఎన్ఆర్లు రద్దయ్యాయని పేర్కొంది.
ప్రైవేట్ రైళ్లతో..
వెయిటింగ్ లిస్ట్ సమస్యను అధిగమించే ప్రయత్నాల్లో భాగంగా ప్రైవేట్ రైళ్లకూ అనుమతులు ఇచ్చింది రైల్వే శాఖ. ప్రయాణికుల రద్దీ అధికంగా ఉండే మార్గాల్లో ప్రత్యేక 'క్లోన్ రైళ్ల'ను ప్రవేశపెట్టింది. సాధారణ రైళ్ల కంటే అధిక వేగంతో ప్రయాణించే ఈ రైళ్లకు స్టాప్లు పరిమితంగా ఉంటాయి. అయితే ప్రయాణికుల సంఖ్య గణనీయంగా పెరగడం వల్ల తరచూ ఈ సమస్యలు తలెత్తుతూనే ఉన్నాయని రైల్వే అధికారులు తెలిపారు. పీఎన్ఆర్ రద్దయితే వినియోగదారులు చెల్లించిన సొమ్ము మళ్లీ వారి ఖాతాలో జమవుతుంది. ఈ విధంగా రైల్వేశాఖ భారీ ఆదాయాన్ని కోల్పోయింది.
ఇదీ చదవండి: డిసెంబర్లో 'జాతీయ రైల్ ప్రణాళిక' తుది నివేదిక
