లాక్డౌన్ సడలింపులో భాగంగా ఏర్పాటు చేసిన ప్రత్యేక ప్యాసింజర్ రైళ్లలో.. వచ్చే ఏడు రోజుల కోసం 2లక్షల టికెట్లు అమ్ముడుపోయినట్టు రైల్వేశాఖ తెలిపింది. బుధవారం 20,149 మంది తమ గమ్యస్థానాలకు చేరుకోగా.. గురువారం 25,737 మంది ఈ ప్రత్యేక రైళ్లల్లో ప్రయాణించనున్నట్లు స్పష్టం చేసింది. బుధవారం కేటాయించిన 9 రైళ్లలో 9వేల మంది ప్రయాణికులు దేశ రాజధాని దిల్లీ నుంచి బయల్దేరారు. ఈ-టికెట్ల బుకింగ్ ద్వారా ఇప్పటి వరకు మొత్తం రూ.45.35 కోట్ల ఆదాయం వచ్చినట్లు ప్రకటించింది రైల్వేశాఖ.
ఈ తొమ్మిది రైళ్లలో ఎనిమిదింటికి వాటి సామర్థ్యాన్ని మించి టికెట్లు బుక్ అయ్యాయి. బిహార్ రాజధాని పాట్నాకు వెళ్లే రైలు మాత్రం 87శాతం ప్రయాణికులతో నడిచింది.
వివరాలివే..
- హౌరా నుంచి దిల్లీ వెళ్లే రైలు సామర్థ్యానికి మించి 122శాతం టికెట్లు బుక్ అయ్యాయి.
- దిల్లీ నుంచి తిరువనంతపురం వెళ్లే రైలుకు రిజర్వేషన్ అయిన టికెట్లు 133శాతం.
- దిల్లీ నుంచి చెన్నై వెళ్లే రైలుకు బుక్ అయిన టికెట్లు 150శాతం.
- దిల్లీ నుంచి జమ్ము వెళ్లే రైలుకు 109శాతం టికెట్లు బుక్ అయ్యాయి.
- దిల్లీ నుంచి రాంచీ వెళ్లే రైలుకు బుక్ అయిన టికెట్లు 115శాతం.
- దిల్లీ నుంచి ముంబయి వెళ్లే రైలుకు రిజర్వ్ అయిన టికెట్లు 117శాతం.
- దిల్లీ నుంచి అహ్మదాబాద్, దిబ్రూగఢ్ వెళ్లే రైళ్లకు 102, 133 శాతం చొప్పున టికెట్లు అమ్ముడుపోయాయి.
టికెట్లు సామర్థ్యానికి మించి బుక్ అయ్యాయంటే ప్రయాణికులు రైళ్లలో నిలబడ్డారని అర్థం కాదు. ప్రతి స్టేషన్లో ప్రయాణికులు బోర్డింగ్, డీ బోర్డింగ్ చేస్తున్నారు. ఈ విధంగానే ఎక్కువగా టికెట్లు బుక్ అయ్యాయి.
-రైల్వే అధికారులు
మే 1 నుంచి రాష్ట్రంలో 100కిపైగా శ్రామిక్ రైళ్లు నడుస్తున్నందునే.. బిహార్కు వెళ్లే రైళ్లలో సామర్థ్యం కంటే తక్కువ టికెట్లు బుక్ అయ్యాయని అధికారులు తెలిపారు.
వారి టికెట్లు రద్దు...
జూన్ 30వ తేదీ వరకు బుక్ చేసుకున్న అన్ని రైల్వే టికెట్లను రద్దు చేస్తున్నట్లు రైల్వేశాఖ ప్రకటించింది. అయితే, వలసకూలీలను స్వస్థలాలకు చేర్చేందుకు ఏర్పాటు చేసిన శ్రామిక్, ప్రత్యేక ప్యాసింజర్ రైళ్లు నడుస్తాయని స్పష్టం చేసింది.
