కేంద్ర సాయుధ పోలీసు దళాలు (సీఏపీఎఫ్) క్యాంటీన్లలో వెయ్యికి పైగా విదేశీ ఉత్పత్తులను అమ్మవద్దని కేంద్రం ఆదేశాలు జారీ చేసింది. కేంద్ర పోలీసు దళాలు, సాయుధ పోలీసు దళాలకు చెందిన 17 వందల క్యాంటీన్లలో జూన్ 1 నుంచి కేవలం దేశీయ ఉత్పత్తులను మాత్రమే అమ్మాలని మే 13నే కేంద్ర హోంశాఖ ఆదేశించింది. దేశీయ సంస్థలను ప్రోత్సాహించేందుకు.. ఈ నిర్ణయం తీసుకున్నట్లు తెలిపింది.
ప్రముఖ సంస్థల ఉత్పత్తులు..
డాబర్‌, వీఐపీ ఇండస్ట్రీస్‌, యూరేకా ఫోర్బ్స్‌, జాగ్వార్‌, హిందూస్థాన్‌ యూనీలివర్‌ లిమిటెడ్‌ తిను బండారాలు సహా నెస్లే ఇండియా సంస్థల ఉత్పత్తులు నిషేధిత జాబితాలో ఉన్నాయి. ఈ సంస్థల ఉత్పత్తుల్లో విదేశాల నుంచి దిగుమతి చేసుకున్న వస్తువులు ఉన్నాయని జారీ చేసిన ఆదేశాల్లో కేంద్ర సర్కారు పేర్కొంది. అందుకే వీటిని సీఏపీఎఫ్ క్యాంటీన్ల నుంచి తొలగించినట్లు తెలిపింది.
ఏటా దాదాపు రూ.3 వేల కోట్ల వ్యాపారం..
వివిధ రకాల ఆహార పదార్థాలు, వస్తువుల అమ్మకం ద్వారా సీఏపీఎఫ్ క్యాంటీన్లలో ఏటా 2,800 కోట్ల వ్యాపారం జరుగుతుంది. ఈ క్యాంటీన్లలో దాదాపు 10 లక్షల మంది సిబ్బంది సహా వారి కుటుంబ సభ్యులు 50 లక్షల మంది వరకు వస్తువులను కొనుగోలు చేస్తారు.
