స్కీముల పేరిట స్కాములు చేసిన వారిని చూశాం. నకిలీ బంగారం, దొంగనోట్లు అంటగడుతూ ప్రజలను మోసం చేసే వారినీ చూశాం. కానీ అత్యంత విలువైన, అరుదుగా లభించే రేడియోధార్మిక పదార్థాల పేరిట కోట్ల రూపాయలు కొల్లగొడుతున్న ముఠాను చూశారా? ఆ కథేంటో ఇప్పుడు తెలుసుకుందాం.
రేడియోధార్మిక పదార్థంపై పెట్టుబడి పెట్టి వందల కోట్లు సంపాదించొచ్చని ప్రజలను మోసం చేస్తోందో ముఠా. దీని నెట్వర్క్ దేశవ్యాప్తంగా విస్తరించింది. ఈ ముఠా గుట్టు రట్టు చేశారు రాజస్థాన్లోని జైపూర్ పోలీసులు. 18 మందిని అదుపులోకి తీసుకున్నారు.
"బొమ్మ" చూపిస్తారు:
ముంబయిలో రెన్సెల్ ఇండియా అనే నకిలీ సంస్థను నడుపుతున్న గణేశ్ ఇంగోలే ఆధ్వర్యంలో ఈ ముఠా కార్యకలాపాలు సాగిస్తోంది. అంతర్జాతీయ అణు సంస్థలతో అనుంబంధం ఉందంటూ గణేశ్, అతని భాగస్వామి సత్యనారాయణ ప్రజల్ని నమ్మించారు. డీఆర్డీఓ గుర్తింపు పొందిన అరుదైన రేడియోధార్మిక పదార్థంతో చేసిన "డాన్సింగ్ డాల్" తమ దగ్గరుందని చెప్పారు. అమెరికా అంతరిక్ష పరిశోధన సంస్థ ఈ బొమ్మను అధిక ధరకు కొనుగోలు చేస్తుందని నమ్మించారు.
గణేశ్ మాటలు నమ్మి... పుణెకు చెందిన ముగ్గురు మోసపోయారు. ఏకంగా రూ.7కోట్లు సమర్పించుకున్నారు.
పరీక్షించడానికి రూ.70 లక్షలు:
కొనుగోలు చేసే ముందు రేడియోధార్మిక పదార్థాన్ని పరీక్ష చేయించుకోమని సూచించింది గణేశ్ ముఠా. ఇందుకు డీఆర్డీఓ శాస్త్రవేత్త పేరిట ఓ వ్యక్తిని పరిచయం చేసింది. అతడు పరీక్షించి, ధ్రువపత్రం ఇచ్చేందుకు రూ.70లక్షలు వసూలు చేసింది.
దర్యాప్తు ముమ్మరం:
మోసపోయిన వారిలో ఒకరు జైపూర్ జవహర్ నగర్ పోలీస్ స్టేషన్లో కేసు నమోదు చేశారు. దర్యాప్తు జరిపిన పోలీసులు... గణేశ్ ముఠాలో 18మందిని అరెస్టు చేశారు. అరెస్టయిన వారిలో జైపూర్, దిల్లీ, ముంబయి, ఇండోర్, ఉత్తర్ప్రదేశ్కు చెందినవారు ఉన్నారు.
