మంగళవారం అర్ధరాత్రి దాటాక దిల్లీ పోలీసు ఉన్నతాధికారులతో సమావేశమయ్యారు జాతీయ భద్రతా సలహాదారు అజిత్ డోభాల్. భద్రతా పరిస్థితులపై దిల్లీ సీలంపుర్ డీసీపీ కార్యాలయంలో సమీక్ష నిర్వహించిన అనంతరం.. అల్లర్లు జరిగిన ప్రాంతాల్ని సందర్శించారు. సీలంపుర్, జాఫ్రాబాద్, మౌజ్పుర్, గోకుల్పురి చౌక్లలో పరిస్థితుల్ని పరిశీలించారు.
నూతనంగా నియమితులైన దిల్లీ పోలీస్ స్పెషల్ కమిషనర్(శాంతి భద్రతలు) శ్రీవాత్సవ, ఇతర సీనియర్ స్థాయి పోలీస్ అధికారులు డోభాల్తో సమావేశంలో పాల్గొన్నారు. భద్రతా ఏర్పాట్లు, పోలీస్ బలగాల మోహరింపుపై అధికారులను అడిగి తెలుసుకున్నారు.
నిరసనకారులు వెనక్కి...
పౌర చట్టంపై కొనసాగుతున్న ఆందోళనలు జాఫ్రాబాద్, మౌజ్పుర్లో తగ్గుముఖం పట్టాయని అన్నారు దిల్లీ పోలీస్ స్పెషల్ కమిషనర్ సతీశ్ గోల్చా. జాఫ్రాబాద్ మెట్రో స్టేషన్, మౌజ్పుర్ చౌక్ నుంచి నిరసనకారులు వెనుదిరిగారని స్పష్టం చేశారు.
ఈశాన్య దిల్లీలో సీఏఏ వ్యతిరేక, అనుకూల వర్గాలు ఈనెల 23న చేపట్టిన ఆందోళనలతో ఘర్షణలు ప్రారంభం అయ్యాయి. ఈ ఘర్షణల్లో ఇప్పటివరకు 13 మంది ప్రాణాలు కోల్పోయారు. ఇందులో ఓ హెడ్ కానిస్టేబుల్ కూడా ఉన్నారు.
