న్యాయవ్యవస్థలో నెలకొన్న ఖాళీలపై సుప్రీంకోర్టు ఆందోళన వ్యక్తం చేసింది. న్యాయశాఖలో భారీ స్థాయిలో ఉన్న ఖాళీలను భర్తీ చేయటమే అత్యంత ముఖ్యమైన పని అని వ్యాఖ్యానించింది. దేశంలోని అన్ని రాష్ట్రాలు, కేంద్ర పాలిత ప్రాంతాలు.. అందులోని 24 హైకోర్టుల ప్రగతిపై అత్యున్నత న్యాయస్థానం సమీక్ష చేస్తూ ఈ వ్యాఖ్యలు చేసింది.
దేశంలోని అన్ని దిగువ కోర్టుల్లో కలిపి 5వేల ఖాళీలు ఉన్నట్లు 2018లో సుప్రీం కోర్టు తెలిపింది. ఈ ఏడాది జూన్ 30 లోపు ఆ ఖాళీలను భర్తీ చేయాలని అన్ని రాష్ట్రాలకు ఆదేశాలు జారీ చేసింది. ఇప్పటి వరకు జరిగిన నియామక ప్రక్రియపై మంగళవారం సమీక్ష నిర్వహించింది సుప్రీం కోర్టు. అన్ని హైకోర్టుల జనరల్ రిజిస్ట్రార్లతో పాటు 29 రాష్ట్రాలు, 7 కేంద్ర పాలిత ప్రాంతాల న్యాయశాఖ కార్యదర్శులు హాజరయ్యారు.
పూర్తి నివేదిక..
ఆయా రాష్ట్రాల్లోని భర్తీ పురోగతిపై భారత ప్రధాన న్యాయమూర్తి జస్టిస్ రంజన్ గొగొయి నేతృత్వంలోని ధర్మాసనం అసంతృప్తి వ్యక్తం చేసింది. న్యాయవ్యవస్థలో ఖాళీలను భర్తీ చేయటం కన్నా ముఖ్యమైన కార్యక్రమం ఏముందీ అనీ.. మళ్లీ పూర్తి స్థాయి నివేదికను అందజేయాలని ఆదేశించింది.
15 రోజుల్లోగా...
ఇచ్చిన గడువు పూర్తయినా ఎందుకు భర్తీ చేయలేదని న్యాయశాఖ కార్యదర్శులను ప్రశ్నించింది సుప్రీం. ఇప్పటికైనా స్పందించి భర్తీ ప్రక్రియ సత్వరమే పూర్తిచేసేందుకు ఎలాంటి చర్యలు తీసుకుంటున్నారని ఆరా తీసింది. భర్తీకి కనిష్ఠంగా మూడు నెలల గడువు కావాలని కొన్ని రాష్ట్రాలు కోరగా.. 15 రోజుల్లో పూర్తి చేయాలని సుప్రీం ఆదేశించింది.
ఇదీ చూడండి: వేతన కోడ్ బిల్లుకు లోక్సభ ఆమోదం
