భారీ వర్షాలతో వణికిన ఉత్తరాది రాష్ట్రాలను వరదలు ముంచెత్తుతున్నాయి. హిమాచల్ ప్రదేశ్, ఉత్తరాఖండ్లో కుండపోత వర్షాలకు కొండచరియలు విరిగి పడ్డాయి. పంజాబ్, హరియాణాలో భారీ వరదలకు నదులు ఉప్పొంగి ప్రవహిస్తున్నాయి. ఉత్తరాది రాష్ట్రాల్లో వరద మృతుల సంఖ్య 42కు చేరింది.
దిల్లీ...
దేశ రాజధాని దిల్లీలో యమునా నది ఉద్ధృతంగా ప్రవహిస్తోంది. హరియాణా నుంచి వస్తున్న వరదలే ఇందుకు కారణం. యమునా నది ప్రవాహం ప్రజలకు కంటిమీద కునుకులేకుండా చేస్తోంది. పైనుంచి మరింత నీరు విడుదల కావడం వల్ల దిల్లీ ప్రభుత్వం అప్రమత్తమైంది. అయితే పరిస్థితి అదుపులోనే ఉందని దిల్లీ సీఎం కేజ్రివాల్‌ వెల్లడించారు.
హిమాచల్ ప్రదేశ్...
వరద బాధితులను అన్ని విధాలా ఆదుకుంటామని హిమాచల్ ప్రదేశ్ సీఎం జైరాం ఠాకూర్‌ తెలిపారు. రోడ్లు, విద్యుత్‌, తాగునీటి వ్యవస్థలను యుద్ధప్రాతిపదికన పునరుద్దరిస్తున్నట్లు పేర్కొన్నారు. మండి జిల్లా చత్రులో చిక్కుకుపోయిన కేరళ నటి మంజు వారియర్‌ సహా... ఆమె చిత్ర బృందాన్ని అధికారులు రక్షించారు.
ఉత్తరాఖండ్...
వరద ప్రభావిత ప్రాంతాల్లో పర్యటించిన ఉత్తరాఖండ్ ముఖ‌్యమంత్రి త్రివేంద్ర సింగ్ రావత్ బాధితులను పరామర్శించారు. సహాయక చర్యలకు రూ.320 కోట్లు ఖర్చు చేస్తునట్లు తెలిపారు.
హరియాణా...
హరియాణాలో యమునానగర్, కైతాల్‌, కురుక్షేత్ర, కర్నాల్‌, పానిపట్‌, సోనెపట్‌ జిల్లాల్లో ప్రజలను ఖాళీ చేయించాలని ప్రభుత్వం ఆదేశించింది. మార్కండ్‌, టాంద్రి, గగ్గర్‌ నదుల్లో నీటి మట్టం కాస్త పెరిగినా మళ్లీ తగ్గుతోందని అధికారులు తెలిపారు.
పంజాబ్...
పంజాబ్ రాష్ట్రంలోని లుధియానా, రూపానగర్, జలంధర్ గ్రామాలు సట్లేజ్ నది ప్రవాహంతో జలదిగ్బంధంలోనే ఉన్నాయి. బాక్రా డ్యాం నుంచి నీరు విడుదల చేయడం వల్ల సట్లేజ్ నది సహా ఉపనదులు ఉద్ధృతంగా ప్రవహిస్తున్నాయి. పలు గ్రామాల్లోని పంటలను నీటిపాలు చేశాయి.
