ఉత్తర భారతదేశంలో ఉష్ణోగ్రతలు కనిష్ఠ స్థాయికి పడిపోయాయి. కశ్మీర్లోయలో అతిస్వల్ప ఉష్ణోగ్రతలు నమోదయ్యే 40 రోజుల 'చిల్లయి కలాన్' సీజన్ ప్రారంభమైంది. ఉత్తర కశ్మీర్లోని గుల్మార్గ్లో అత్యల్పంగా -9.6 డిగ్రీల సెల్సియస్ ఉష్ణోగ్రత నమోదైంది. అమర్నాథ్ పర్యటకుల బేస్ క్యాంప్ అయిన పహల్గావ్లో 21 సెంటీమీటర్ల మేర హిమపాతం నమోదైంది. కాజీకుండ్లో 38.5 సెంటీమీటర్ల మంచు కురిసింది. శ్రీనగర్లో -0.4 డిగ్రీల ఉష్ణోగ్రత నమోదు కాగా లద్దాఖ్ ప్రాంతంలోని లేహ్ జిల్లాలో -9.5 డిగ్రీల కనిష్ఠ ఉష్ణోగ్రత ఉంది.
పంజాబ్, హరియాణా రాష్ట్రాల్లోనూ చలి వణుకు పుట్టిస్తోంది. బఠిండాలో అత్యల్పంగా 5.6 డిగ్రీల ఉష్ణోగ్రత నమోదైంది. అమృత్సర్, లూథియానాలో భారీగా పొగమంచు ఏర్పడింది. ఈ ప్రాంతాల్లో వరుసగా 6.6, 7 డిగ్రీల ఉష్ణోగ్రత నమోదైంది. అంబాలా, హిసార్, కర్నాల్లో చలి తీవ్రత అధికంగా ఉంది. ఛండీఘర్లో అత్యల్పంగా 8.6 డిగ్రీల ఉష్ణోగ్రత నమోదైంది.
హిమాచల్ ప్రదేశ్ కీలాంగ్ ప్రాంతంలో 6.4 డిగ్రీల ఉష్ణోగ్రత నమోదు కాగా మనాలీ, చంబా ప్రాంతంలో 9 సెంటీమీటర్ల హిమపాతం కురిసింది. రాష్ట్రంలో గత 24 గంటల్లో 2 నుంచి 4 డిగ్రీల మేర ఉష్ణోగ్రత పడిపోయినట్లు వాతావరణ శాఖ వెల్లడించింది.
దిల్లీలో ప్రమాదరకంగా గాలి నాణ్యత!
దేశరాజధాని దిల్లీలో గాలి నాణ్యత ప్రమాదకరంగానే ఉంది. శనివారం సాయంత్రం 4 గంటల సమయంలో గాలి నాణ్యత సూచీ ప్రమాదకర స్థాయిలో 418 పాయింట్లుగా నమోదైంది. నగరమంతటా పొగమంచు వాతావరణం ఏర్పడింది. రాజధానిలో అత్యధికంగా 18 డిగ్రీలు, అత్యల్పంగా 9.5 డిగ్రీల సెల్సియస్ ఉష్ణోగ్రత నమోదైంది. వాతావరణం ఇలాగే కొనసాగితే వచ్చే 24 గంటల్లో గాలి నాణ్యత మెరుగుపడే అవకాశం ఉందని అధికారులు వెల్లడించారు.
ఇదీ చూడండి: మలేషియా ప్రధాని వ్యాఖ్యలను తిప్పికొట్టిన భారత్
