మహారాష్ట్ర రాజకీయాలు క్షణానికో మలుపు తిరుగుతూ తీవ్ర ఉత్కంఠను రేపుతున్నాయి. గవర్నర్ భగత్సింగ్ కోశ్యారీ సిఫారసుతో రాష్ట్రపతిపాలన విధించినా.. శివసేన మాత్రం వెనక్కు తగ్గడం లేదు. గవర్నర్ తమకు తగినంత గడువు ఇవ్వలేదంటూ సుప్రీంకోర్టును ఆశ్రయించింది. అలాగే రాష్ట్రపతిపాలన విధింపును వ్యతిరేకిస్తూ మరో పిటిషన్ను దాఖలు చేయడానికి సన్నద్ధమైంది. సుప్రీంకోర్టు ఈ పిటిషన్లపై రేపు విచారణ చేపట్టే అవకాశముంది.
నిర్ణయం తీసుకోలేదు..
ప్రభుత్వ ఏర్పాటు కోసం తమ చర్చలు, ప్రయత్నాలు కొనసాగుతాయని మీడియా సమావేశంలో స్పష్టం చేశాయి కాంగ్రెస్, ఎన్సీపీలు. శివసేనకు మద్దతు ఇవ్వడంపై ఇంకా ఎలాంటి నిర్ణయం తీసుకోలేదని పేర్కొన్నాయి. సేన తొలిసారిగా సోమవారమే తమను సంప్రదించిందని తెలిపారు కాంగ్రెస్ సీనియర్ నేత అహ్మద్ పటేల్. మద్దతు విషయంలో మరిన్ని అంశాలపై స్పష్టత కోసం శివసేనతో చర్చలు జరగాల్సి ఉందని వెల్లడించారు.
మహారాష్ట్రలో రాష్ట్రపతిపాలనను కాంగ్రెస్ తీవ్రంగా ఖండించింది. కాంగ్రెస్ను ప్రభుత్వం ఏర్పాటుచేయడానికి గవర్నర్ ఎందుకు ఆహ్వానించలేదని ప్రశ్నించింది.
సిద్ధాంతాలు వేరైనా ఓకే..
సిద్ధాంతాలు వేరైనప్పటికీ కాంగ్రెస్, ఎన్సీపీలతో కలిసి పనిచేస్తామని శివసేన అధినేత ఉద్ధవ్ ఠాక్రే పేర్కొన్నారు. కనీస ఉమ్మడి కార్యక్రమంపై మూడు పార్టీల మధ్య ఓ అవగాహన అవసరమే అని ఆయన అన్నారు. మోదీ ప్రభుత్వం రాష్ట్రపతి పాలన విధించడాన్ని ఆయన తీవ్రంగా ఖండించారు.
ప్రభుత్వం ఏర్పాటువిషయంలో.. కాంగ్రెస్, ఎన్సీపీలతో తాము మొదటిసారిగా నవంబర్ 11న చర్చలు జరిపామని ఉద్ధవ్ ఠాక్రే స్పష్టం చేశారు.
స్థిరమైన ప్రభుత్వ ఏర్పాటే లక్ష్యం...
రాష్ట్రపతి పాలన విధించిన నేపథ్యంలో.. ఇవాళ సాయంత్రం భాజపా కోర్ కమిటీ సమావేశమైంది. రాష్ట్రంలో ప్రస్తుత రాజకీయ పరిణామాలపై చర్చించింది. అయితే.. రాష్ట్రపతి పాలనకు శివసేన మొండివైఖరే కారణమని ఆరోపించారు భాజపా నేత సుధీర్ ముంగంటీవార్. రాష్ట్రంలో స్థిరమైన ప్రభుత్వ ఏర్పాటుకు కృషి చేస్తామన్నారు.
20 రోజులైనా...
మహారాష్ట్ర శాసనసభ ఎన్నికల్లో భాజపా, శివసేన కూటమి విజయం సాధించింది. అయితే ముఖ్యమంత్రి పీఠంపై వివాదంతో ఇరుపార్టీలు ప్రభుత్వం ఏర్పాటుచేయలేకపోయాయి. ఈ నేపథ్యంలో రాష్ట్రపతి పాలన అనివార్యమైంది.
ఇదీ చూడండి: 'ఉగ్రవాద నిర్మూలనే ప్రధాన అంశంగా బ్రిక్స్ సదస్సు'
