మహిళలపై పెరుగుతున్న లైంగిక నేరాలకు అశ్లీల సైట్లే కారణమని బిహార్ ముఖ్యమంత్రి నితీశ్ కుమార్ ఆగ్రహం వ్యక్తం చేశారు. ఇలాంటి వెబ్సైట్లను తక్షణమే నిషేధించాలని ప్రధాని నరేంద్ర మోదీకి లేఖ రాశారు. ఆన్‌లైన్‌లో అందుబాటులో ఉన్న అన్ని అశ్లీల సైట్లను, అనుచిత కంటెంట్ని తొలగించాలని విజ్ఞప్తి చేశారు.
" ఆడపిల్లలు, మహిళలపై అనుచితంగా ప్రవర్తించిన వీడియోలను వాట్సాప్, ఫేస్బుక్ వంటి సామాజిక మాధ్యమాల్లో పెడుతున్నారు. అలాంటి వాటిని చూడటం వల్ల పిల్లలు, యువకుల ఆలోచనలు పాడవుతున్నాయి. మహిళలపై నేరాల రేటు పెరగడానికి ఇవే కారణం.త్వరగా వీటిపై కఠిన చర్యలు తీసుకోవాలని నేను కోరుతున్నాను."
- బిహార్ సీఎం నితీశ్ కుమార్ లేఖ
సదరు వీడియోలు యువకుల మనసులపై ప్రతికూల ప్రభావం చూపిస్తున్నాయన్నారు నితీశ్. ఇలాంటి అశ్లీల సైట్లపై ఉక్కుపాదం మోపడానికి సమాచార 'సాంకేతిక చట్టం- 2000'లో సవరణలు చేసినప్పటికీ...ఈ సమస్యను పరిష్కరించడానికి అవి సమర్థంగా లేవని అభిప్రాయపడ్డారు బిహార్ సీఎం.
ఈ విషయంపై సుప్రీం కోర్టు పలు మార్గదర్శకాలను ఇచ్చినట్లు ప్రస్తావించారు నితీశ్. ఇంటర్నెట్ సర్వీస్ ప్రొవైడర్లకు కఠిన ఆదేశాలు జారీ చేయాలని.. ప్రజల్లో అవగాహన కార్యక్రమాలు నిర్వహించాలని కోరారు.
ఇదీ చూడండి : 'లోక్సభ సభ్యుల సంఖ్య 1000కి పెంచాలి'
