గతేడాది ఫిబ్రవరిలో జరిగిన పుల్వామా ఉగ్రదాడి కేసులో జాతీయ దర్యాప్తు సంస్థ అభియోగ పత్రం దాఖలు చేసింది. సుమారు 13,500 పేజీల సుదీర్ఘ ఛార్జిషీటులో జైషే మహ్మద్ అధినేత మసూద్ అజర్తో పాటు అతని బంధువులు అమ్మర్ ఆల్వి, అబ్దుల్ రవూఫ్ను చేర్చింది.
ఘటన జరిగిన 18 నెలల తర్వాత ఈ కేసు కొలిక్కి వచ్చినట్లు తెలుస్తోంది. ఎలక్ట్రానిక్ ఆధారాలు, వివిధ కేసుల్లో అరెస్టయిన ఉగ్రవాదులు, వారి సానుభూతిపరులు ఇచ్చిన వాంగ్మూలాల ఆధారంగా కేసును పరిష్కరించింది ఎన్ఐఏ.
19 మందిపై ఛార్జిషీటు..
పాకిస్థాన్లో జేఈఎం రచించిన ఈ కుట్రలో మొత్తం 19 మందిని నిందితులుగా పేర్కొంది ఎన్ఐఏ. వీరిలో ఆత్మాహుతి దాడికి పాల్పడిన ఆదిల్ దార్కు ఆశ్రయం ఇచ్చిన వారూ ఉన్నారు. ఈ జాబితాలో ఇప్పటికే 7 ఉగ్రవాదులు హతం కాగా మరో ఏడుగురు అరెస్టయ్యారు. నలుగురు పరారీలో ఉన్నారు.
ఈ కేసు దర్యాప్తునకు ఎన్ఐఏ జాయింట్ డైరెక్టర్ అని శుక్లా నేతృత్వం వహించారు. బ్యాటరీలు, ఫోన్లు, ఇతర రసాయనాల కొనుగోలు కోసం ఈ- కామర్స్ సైట్లను ఉపయోగించినట్లు గుర్తించారు.
పుల్వామా ఉగ్రదాడి..
2019 ఫిబ్రవరి 14న పుల్వామాలో సీఆర్పీఎఫ్ జవాన్ల వాహన శ్రేణి లక్ష్యంగా ఆత్మాహుతి దాడి జరిగింది. ఆదిల్ దార్ 200 కిలోల ఐఈడీ అమర్చిన కారులో కాన్వాయ్ను ఢీ కొట్టాడు. ఈ ఉగ్రదాడిలో 40 మంది జవాన్లు అమరులయ్యారు. మరికొంత మంది తీవ్రంగా గాయపడ్డారు.
ఇదీ చూడండి: పుల్వామా దాడి కేసులో మరో ఇద్దరు అరెస్ట్
