మోదీకి కుటుంబమంటే ఏంటో తెలీదు : పవార్​

ప్రధాని మోదీకి కుటుంబం అంటే ఏంటో తెలియదని ఎద్దేవా చేశారు ఎన్​సీపీ అధినేత శరద్​ పవార్​. అలాంటి వ్యక్తి తమ కుటుంబంపై నిందలు వేస్తున్నారని విమర్శించారు. పవార్​ కుటుంబంలో విభేదాలు ఉన్నాయని మోదీ ఇటీవలే ఆరోపించారు.

పవార్​ కుటుంబంలో అంతర్గత కలహాలు ఉన్నట్లు ఇటీవల ఆరోపణలు చేసిన ప్రధాని మోదీపై ఎదురుదాడి చేశారు నేషనలిస్టు కాంగ్రెస్​ పార్టీ అధ్యక్షుడు శరద్ ​పవార్​. కుటుంబం గురించి తెలియని వాళ్లు ఈ నిందలు చేస్తున్నారని ఎద్దేవా చేశారు. వారి కుటుంబ సభ్యులు ఎక్కడున్నారో కూడా మోదీకి తెలియదని అన్నారు. తాము మంచి విలువలతో పెరిగామని, తమ సోదరులంతా సమాజంలో విశిష్ఠ పేరున్న వ్యక్తులని గుర్తుచేశారు.

జవహర్​లాల్​ నెహ్రూ, వైబీ చవాన్​ లాంటి ప్రముఖ నేతల నుంచి విలువలను నేర్చుకున్నా. వైఫల్యాలను కప్పిపుచ్చుకోవటానికి భాజపా నేతలు గాంధీ కుటుంబాన్ని విమర్శిస్తున్నారు. ఇప్పుడు మా కుటుంబాన్ని ఈ ఆరోపణల జాబితాలో చేర్చారు.

- శరద్​ పవార్​, ఎన్​సీపీ అధ్యక్షుడు.

మహారాష్ట్ర వార్దాలో ఈ నెల​ 1న జరిగిన ర్యాలీలో ప్రసంగించిన ప్రధాని... ఎన్సీపీపై శరద్​ పవార్​ పట్టుకోల్పోతున్నారని అన్నారు. శరత్​ పవార్​ సోదరుడి కుమారుడు అజిత్​ పవార్​... పార్టీని నియంత్రణలోకి తీసుకోవాలనుకుంటున్నారని, అందువల్లే టికెట్ల పంపిణీలో పార్టీ సమస్యలు ఎదుర్కొన్నదని ఆరోపించారు.