హిమాచల్ ప్రదేశ్లోని అటల్ సొరంగ మార్గాన్ని... అక్టోబర్ 3న ప్రధానమంత్రి నరేంద్రమోదీ ఘనంగా ప్రారంభించారు. ఆ మరుసటి రోజే... అక్కడ పలు యాక్సిడెంట్లు జరిగాయి. వాహనదారుల అతివేగం, సెల్ఫీ తీసుకోవడం కారణంగానే ఈ ప్రమాదాలు జరిగినట్లు అధికారులు చెబుతున్నారు.
ఈ మార్గంలో పర్యవేక్షణ చేపట్టని స్థానిక అధికారులపై బోర్డర్స్ రోడ్స్ ఆర్గనైజేషన్(బీఆర్ఓ) ఆగ్రహం వ్యక్తం చేసింది. బీఆర్ఓ వ్యాఖ్యలపై స్పందించిన హిమాచల్ రాష్ట్ర ప్రభుత్వం 48 గంటల తర్వాత పోలీసులను నియమించింది.
'ఎప్పుడో చెప్పాం..'
తాము ఈ మార్గంలో ట్రాఫిక్ను నియంత్రించడానికి కావాల్సిన బలగాల సమాచారాన్ని ముఖ్యమంత్రి కార్యాలయానికి జులై 3న పంపించినట్లు బీఆర్ఓ చీఫ్ ఇంజినీర్ కె.పి.పురుషోత్తమ్ చెప్పారు. అక్టోబర్ 2న స్థానిక అధికారులకు అందించినట్లు తెలిపారు.
"అక్టోబర్ 4న జరిగిన మూడు ప్రమాదాలకు కారణం.. అతివేగమే. సొరంగ మార్గాన్ని దాటుతుండగా మధ్యలో వాళ్లు తమ వాహనాలను ఆపారు. సీసీటీవీల్లో ఈ విషయం నమోదైంది. డబుల్ లేన్గా మారేవరకు ఈ దారి మధ్యలో వాహనాలను ఆపేందుకు అనుమతి లేదు. ఓవర్ టేకింగ్ చేయడానికి వీలు లేదు."
-- కె.పి.పురుషోత్తం, బీఆర్ఓ ఛీఫ్
టన్నెల్ ఆవిష్కరించిన రోజు... భద్రతా సిబ్బందిని నియమించడం, ఫైర్ ఇంజిన్ ఏర్పాటు చేయాల్సిందిగా స్థానిక పోలీసులకు బీఆర్ఓ సూచించింది.
భద్రతా చర్యలు...
అవాంఛనీయ ఘటనలు జరగకుండా ఉండేందుకు సొరంగ మార్గంలోకి మండే పదార్థాలను అనుతించడం లేదు. ప్రతిరోజూ.. ఉదయం, సాయంత్రం వేళల్లో రెండు గంటలపాటు మార్గాన్ని మూసేసి శుభ్రం చేస్తున్నారు. ఆ సమయంలో వాహనాల రాకపోకలకు అనుమతి ఉండదు. శీతల వాతావరణంలో వాహనదారుల భద్రత కోసం... చండీగఢ్కు చెందిన స్నో అండ్ అవలాంచె స్టడీ ఎస్టాబ్లిష్మెంట్ ఈ సొరంగంలో యాంత్రిక నిర్మాణాలను సిద్ధం చేసింది.
