ఆర్టికల్ 370ని రద్దు చేసి ప్రధానమంత్రి నరేంద్రమోదీ... పాకిస్థాన్కు తన స్థానాన్ని చూపించారని కేంద్ర హోంమంత్రి అమిత్ షా తెలిపారు. ఝార్ఖండ్లో 'జోహార్ జన్ ఆశీర్వాద్ యాత్ర'ను ప్రారంభించిన అనంతరం షా ఈ వ్యాఖ్యలు చేశారు. ఈ సందర్భంగా కాంగ్రెస్ పార్టీపై విరుచుకుపడ్డారు కేంద్ర హోంమంత్రి. ఆర్టికల్ 370 రద్దును హస్తం పార్టీ ఎందుకు వ్యతిరేకించిందని ప్రశ్నించిన షా... ఈ అంశంపై కాంగ్రెస్ నేత రాహుల్ గాంధీ తన వైఖరిని ప్రజలకు తెలపాలని డిమాండ్ చేశారు.
"ఆర్టికల్ 370, 35-ఏ లను మోదీ రద్దు చేశారు. కానీ కాంగ్రెస్ దీనిని ఎందుకు వ్యతిరేకించింది? ఆర్టికల్ 370ని రద్దు చేయాలని మోదీ పార్లమెంట్లో బిల్లును తీసుకొచ్చారు. ఓటింగ్ జరిగింది. కానీ కాంగ్రెస్ పార్టీ వ్యతిరేకించింది. కశ్మీర్కు స్వయం ప్రతిపత్తి రద్దు చేయడానికి అనుకూలంగా ఉన్నారా? లేదా వ్యతిరేకిస్తున్నారా? అనే విషయాన్ని రాహుల్ గాంధీ ఝార్ఖండ్ వచ్చినప్పుడు స్పష్టం చేయాలి. మేం మెరుపుదాడులు చేస్తాం.. రాహుల్ గాంధీ వ్యతిరేకిస్తారు. మేం వైమానిక దాడులు చేస్తాం.. ఆధారాలు అడుగుతారు. మీరు ఏ మార్గంలో నడవాలనుకుంటున్నారో ప్రజలకు తెలపండి. "
--- అమిత్ షా, కేంద్ర హోంమంత్రి.
ఝార్ఖండ్ అభివృద్ధి కోసం మోదీ ప్రభుత్వం ఎంతో కృషి చేస్తోందన్నారు షా. రాష్ట్రంలో విద్యుత్, ఆరోగ్య, గృహ, వంట గ్యాస్ అనుసంధానాలపై కేంద్రం చేపట్టిన కార్యక్రమాలను ప్రజలకు వివరించారు.
ఝార్ఖండ్ సహా మహారాష్ట్ర, హరియాణాలో ఈ ఏడాది ఎన్నికలు జరగనున్నాయి.
ఇదీ చూడండి:- జైల్లో చిదంబరాన్ని కలిసిన కాంగ్రెస్ నేతలు
