'స్వచ్ఛభారత్​, మెరుపు దాడులంటే కాంగ్రెస్​కు కడుపునొప్పి'

స్వచ్ఛ భారత్, మెరుపుదాడి అంశాలను ప్రస్తావిస్తే కాంగ్రెస్​ భరించలేదని విమర్శించారు ప్రధాని నరేంద్ర మోదీ. వారి పాలన అవినీతిమయమని.. వ్యవసాయం, క్రీడా రంగాల్లోనూ కుంభకోణాలు జరిగాయని ఆరోపించారు. హరియాణా సోనిపత్​లో ఎన్నికల ప్రచారంలో పాల్గొన్నారు మోదీ.

కాంగ్రెస్​పై తీవ్ర విమర్శలు చేశారు ప్రధానమంత్రి నరేంద్ర మోదీ. వారి పాలనలో రైతులు, జవాన్లు, క్రీడాకారులకు రక్షణ ఉండేది కాదని ఆరోపించారు. వ్యవసాయం, క్రీడా రంగాల్లోనూ అవినీతి జరిగేదని ధ్వజమెత్తారు.

హరియాణాలోని సోనిపత్ జిల్లా గోహానాలో ఎన్నికల ర్యాలీకి హాజరయ్యారు మోదీ. కాంగ్రెస్​పై నిప్పులు చెరిగారు.

"ఆగస్టు 5 నుంచి జమ్ముకశ్మీర్​లో భారత రాజ్యంగం పూర్తిగా అమల్లోకి వచ్చేలా చేశాం. కశ్మీర్, లద్దాఖ్​ అభివృద్ధికి అడ్డుగా ఉన్న ఆర్టికల్​ 370ని రద్దు చేశాం. అప్పటి నుంచి కాంగ్రెస్, ఆ పార్టీ మిత్రపక్ష నేతలు భరించలేని కడుపునొప్పితో బాధపడుతున్నారు. ఆ నొప్పి తగ్గించడానికి ఏ ఔషధమూ పనిచేయడం లేదు. కాంగ్రెస్​కు​ ఎలాంటి బాధ వచ్చిందంటే... మనం స్వచ్ఛ భారత్​ గురించి మాట్లాడితే వారికి కడుపునొప్పి వస్తుంది. మెరుపుదాడిని ప్రస్తావిస్తే వారి బాధ మరింత తీవ్రమవుతుంది. పొరపాటున ఎవరైనా బాలాకోట్​ పేరు చెబితే ఇక కాంగ్రెస్​ నేతలు భరించలేని నొప్పితో ఎగిరిపడతారు."
-నరేంద్ర మోదీ, ప్రధాన మంత్రి

తీవ్రవాదంపై పోరులోనైనా, రెజ్లింగ్​ రింగ్​లో పోరాటానికైనా సోనిపత్ ప్రాంతం దేశానికి గర్వకారణమని కొనియాడారు మోదీ. రైతులు, జవాన్లు, రెజ్లర్లకు సోనిపత్ మారుపేరని అభివర్ణించారు.

ఇదీ చూడండి- పాపాల పాకిస్థాన్​కు ఎఫ్​ఏటీఎఫ్​ 'బ్లాక్​లిస్ట్'​ ముప్పు!