అమెరికాలో జరిగిన 'హౌడీ మోదీ' కార్యక్రమంపై కాంగ్రెస్ విమర్శనాస్త్రాలు సంధించింది. అమెరికా అధ్యక్షుడు డొనాల్డ్ ట్రంప్నకు ప్రచారం చేసి.. స్వయంగా ప్రధానమంత్రే భారతదేశ విదేశాంగ విధానాన్ని ఉల్లంఘించారని మండిపడింది. భారత విదేశాంగ విధానం ప్రకారం మరొక దేశంలో జరిగే ఎన్నికల్లో జోక్యం చేసుకోకూడదని హస్తం పార్టీ నేతలు ఆరోపించారు. నరేంద్ర మోదీ పక్షపాత ధోరణితో దీర్ఘకాల భారత్- అమెరికా వ్యూహాత్మక సంబంధాలు దెబ్బతినే అవకాశముందని ఆరోపించారు.
గౌరవనీయులైన ప్రధాని.. మరొక దేశంలో జరిగే సార్వత్రిక ఎన్నికల్లో జోక్యం చేసుకోకూడదనే భారత విదేశాంగ విధానాన్ని మీరు ఉల్లంఘించారు. ఈ చర్య వల్ల దీర్ఘకార భారత ప్రయోజనాలను నాశనం చేశారు.
-ఆనంద్ శర్మ, కాంగ్రెస్ సీనియర్ నేత
అమెరికా మాజీ అధ్యక్షుడు జార్జ్ బుష్ నేతృత్వంలోని రిపబ్లికన్ ప్రభుత్వ హయాంలో భారత మాజీ ప్రధాని మన్మోహన్ అణు ఒప్పందం చేసుకున్నారని ఆనంద్ శర్మ గుర్తుచేశారు. అనంతరం బరాక్ ఒబామా (డెమొక్రాట్)తోనూ సత్సంబంధాలు నెలకొల్పినట్టు తెలిపారు. కానీ 'అబ్కీ బార్ ట్రంప్ సర్కార్' అంటూ మోదీ పక్షపాతం వహించారని ఆనంద్ శర్మ మండిపడ్డారు.
కాంగ్రెస్ ద్వైపాక్షిక ఒప్పందాలు మాత్రమే జరిపిందని.. మోదీలాగా మరొక దేశాధినేతకు ప్రచారం చేయలేదని అయన అన్నారు. భారతదేశ ప్రధానిగా మోదీ అమెరికా వెళ్లారని.. అగ్రరాజ్య ఎన్నికల ప్రచారం కోసం కాదని ఎద్దేవా చేశారు ఆనంద్ శర్మ.
ఇదీ చూడండి:'సాధారణ స్థితికి వచ్చాకే కశ్మీర్ ఎన్నికలు'
