జమ్ముకశ్మీర్ బారముల్లాలో సీఆర్పీఎఫ్ జవాన్లు, పోలీసులే లక్ష్యంగా దాడికి పాల్పడిన ఉగ్రమూకలపై ప్రతీకారం తీర్చుకున్నాయి భద్రతా దళాలు. ఇద్దరు సీఆర్పీఎఫ్ జవాన్లు, ఓ పోలీసు అధికారి వీరమరణానికి కారణమైన వారిపై ఉక్కుపాదం మోపాయి. దాడి జరిగిన కొన్ని గంటల్లోనే ఉగ్రమూకలను గుర్తించి.. ఇద్దరిని హతమార్చాయి.
బారాముల్లాలో తనిఖీలు నిర్వహిస్తున్న సీఆర్పీఎఫ్, స్థానిక పోలీసులపై ఉగ్రవాదులు కాల్పులకు పాల్పడ్డారు. ఈ ఘటనలో ఇద్దరు సీఆర్పీఎఫ్ జవాన్లు, ఓ స్థానిక పోలీసు అధికారి వీరమణం పొందారు. దాడి జరిగిన వెంటనే భద్రతా దళాలు రంగంలోకి దిగాయి. సమీప ప్రాంతాలను జల్లెడపట్టాయి. ఈ క్రమంలో క్రీరి ప్రాంతంలో ఉగ్రమూకలు నక్కిఉన్నట్లు గుర్తించి చుట్టుముట్టారు జవాన్లు. ఇరువురి మధ్య ఎదురుకాల్పులు జరిగాయి. బలగాల కాల్పుల్లో ఇద్దరు ముష్కరులు హతమయ్యారు.
మృతి చెందిన ఉగ్రవాదులు.. లష్కరే తోయిబా (ఎల్ఈటీ)కి చెందిన వారిగా అనుమానిస్తున్నారు అధికారులు. ఉగ్రవాదుల ఏరివేత కొనసాగుతున్నట్లు తెలిపారు కశ్మీర్ ఐజీపీ విజయ్ కుమార్. బారముల్లా దాడిలో ముగ్గురు లష్కరే తోయిబా ఉగ్రవాదులు పాల్గొన్నట్లు భావిస్తున్నట్లు చెప్పారు.
" స్థానికులు తెలిపిన వివరాల ప్రకారం.. ముగ్గురు ఉగ్రవాదులు జవాన్లపై కాల్పులకు పాల్పడ్డారు. లష్కరే తోయిబా ఈ దాడికి పాల్పడినట్లు తెలుస్తోంది. త్వరలోనే వారికి దీటైన సమాధానం చెబుతాం. తనిఖీలు కొనసాగుతున్నాయి. త్వరలోనే అందరిని మట్టుబెడతామనే నమ్మకం ఉంది.
- విజయ్ కుమార్, కశ్మీర్ ఐజీపీ
ఉగ్రవాదులు తమ వ్యూహాలను మార్చుకుని భద్రతా దళాలపై దాడి చేసి పారిపోతున్నారా? అని అడిగిన ప్రశ్నకు..ఈ విధంగా చేయటం ఆందోళన కలిగించే విషయమన్నారు ఐజీపీ. అయితే.. త్వరలోనే ఈ సమస్యకు పరిష్కారం చూపుతామన్నారు.
ఇదీ చూడండి: కాంగ్రెస్లో '100 లేఖల' దుమారం- ఏది నిజం?
