లాక్డౌన్ను మే 31వరకు పొడగిస్తూ ఇచ్చిన మార్గదర్శకాలను నీరుగార్చొద్దని రాష్ట్రాలు/కేంద్రపాలిత ప్రాంతాలకు కేంద్ర హోంశాఖ సూచించింది. రాష్ట్రాల అభ్యర్థనను పరిగణలోకి తీసుకునే మార్గదర్శకాలు రూపొందించినట్లు స్పష్టం చేసింది.
ఈ మేరకు మార్గదర్శకాలను కట్టుదిట్టంగా అమలు చేయాలని అన్ని రాష్ట్రాలు, కేంద్రపాలిత ప్రాంతాల సీఎస్లకు హోంశాఖ కార్యదర్శి అజయ్ భల్లా లేఖ రాశారు.
"హోంశాఖ జారీ చేసిన మార్గదర్శకాలను ఏ రాష్ట్రం కూడా నీరుగార్చొద్దు. నూతన మార్గదర్శకాలను కఠినంగా అమలు చేసేలా అధికారులను నిర్దేశించాలని రాష్ట్రాలను కోరుతున్నా. జోన్ల పరిధిలో ఉన్న పరిస్థితులను బట్టి అవసరమైతే మరిన్ని కార్యకలాపాలపై నిషేధం విధించవచ్చు. "-అజయ్ భల్లా, కేంద్ర హోంశాఖ కార్యదర్శి
కేంద్రం మార్గదర్శకాలు అనుసరించి జోన్లను నిర్ణయించే అధికారం రాష్ట్రాలకే ఉందన్న విషయాన్ని గుర్తు చేశారు భల్లా. రెడ్, ఆరెంజ్ జోన్లలో కంటైన్మెంట్, బఫర్ జోన్లను జిల్లా లేదా స్థానిక యంత్రాంగం గుర్తిస్తుందని తెలిపారు.
కంటైన్మెంట్ జోన్లలో ఆంక్షలు కట్టుదిట్టంగా అమలు చేయాలని సీఎస్లకు సూచించారు. అత్యవసర అవసరాలకు మినహాయించి ఏ ఒక్కరినీ బయట తిరగకుండా చూడాలని పేర్కొన్నారు. కొన్ని కార్యక్రమాలపై దేశవ్యాప్తంగా పూర్తి నిషేధం అమలులో ఉంటుందని స్పష్టం చేశారు.
మే 31 వరకు..
కరోనా కట్టడికి దేశవ్యాప్తంగా లాక్డౌన్ను మే 31 వరకు పొడగిస్తూ జాతీయ విపత్తు నిర్వహణ సంస్థ(ఎన్డీఎంఏ) ఆదేశాలు జారీ చేసింది. అనంతరం హోంశాఖ నూతన మార్గదర్శకాలు విడుదల చేసింది. అంతర్ రాష్ట్ర బస్సులకు అనుమతిచ్చింది. జోన్ల నిర్ణయాధికారం రాష్ట్రాలకే కట్టబెట్టింది. విమానాలు, రైళ్లు, మెట్రోలపై నిషేధం కొనసాగించింది.
ఇదీ చదవండి: తెలుగమ్మాయి శ్రావ్యకు ట్రంప్ సత్కారం
