దేశవ్యాప్తంగా సంచలనం సృష్టించిన హాథ్రస్ ఘటనపై ఆందోళనలు కొనసాగుతున్నాయి. కాంగ్రెస్ సహా ఇతర పార్టీలు బాధిత కుటుంబాన్ని కలిసేందుకు ప్రయత్నించిన క్రమంలో.. రాజకీయ నేతలతో పాటు మీడియాపైనా ఆంక్షలు విధించారు అధికారులు. అయితే గ్రామంలో ప్రస్తుతం ప్రత్యేక దర్యాప్తు బృందం (సిట్) దర్యాప్తు పూర్తయిన క్రమంలో.. మీడియాకు అనుమతులు ఇచ్చినట్లు ఎస్డీఎం అధికారి ప్రేమ్ ప్రకాశ్ మీనా తెలిపారు. కానీ, 144 సెక్షన్ అమలులోనే ఉంటుందన్నారు. ఐదుగురికన్నా ఎక్కువ మందిని అనుతించేదిలేదన్నారు.
రాజకీయ నాయకులకు అనుమతులుపై అడిగిన ప్రశ్నకు సమాధానంగా.. ప్రస్తుతానికి కేవలం మీడియాకే ఆంక్షలు సడలించినట్లు చెప్పారు. ఉన్నతాధికారుల నుంచి ఆదేశాలు అందితే ఇతరులను గ్రామంలోకి పంపుతామన్నారు.
హాథ్రస్కు యూపీ ఉన్నతాధికారులు..
బాధితురాలి కుటుంబాన్ని కలిసేందుకు హోంశాఖ అదనపు చీఫ్ సెక్రటరీ, డీజీపీలను హాథ్రాస్కు పంపించారు ముఖ్యమంత్రి యోగి ఆదిత్యనాథ్. ఈ మేరకు అక్కడి పరిస్థితులపై సీఎంకు నివేదిక సమర్పించనున్నారని అధికారవర్గాలు తెలిపాయి.
హాథ్రస్కు మరోమారు కాంగ్రెస్ ఎంపీలు..
అత్యాచార బాధితురాలి కుటుంబాన్ని కలిసేందుకు రాహుల్ గాంధీ నేతృత్వంలో పలువురు కాంగ్రెస్ ప్రతినిధులు హాథ్రస్కు వెళ్లనున్నారు. కాంగ్రెస్ ప్రధాన కార్యదర్శి ప్రియాంక గాంధీ కూడా ఈ బృందంలో ఉన్నారని పార్టీ వర్గాలు తెలిపాయి.
అక్టోబర్ 1న రాహుల్ గాంధీ, ప్రియాంక గాంధీలతో పాటు పలువురు పార్టీ నాయకులు, కార్యకర్తలు హాథ్రస్కు వెళ్లేందుకు ప్రయత్నించారు. కానీ వారిని పోలీసులు అరెస్ట్ చేసి వెనక్కు పంపించేశారు. దీనిపై ఆగ్రహం వ్యక్తం చేశారు రాహుల్ గాంధీ. 'హాథ్రస్హర్రర్' హ్యాష్ట్యాగ్తో ట్వీట్ చేసిన ఆయన... బాధిత యువతి, ఆమె కుటుంబం పట్ల యూపీ ప్రభుత్వం, పోలీసులు ప్రవర్తిస్తున్న తీరు ఆమోదయోగ్యం కాదన్నారు. ఏ ఒక్క భారతీయుడు దానిని అంగీకరించరని పేర్కొన్నారు. ప్రియాంక గాంధీ సైతం యోగి ప్రభుత్వంపై విమర్శలు గుప్పించారు.
ప్రపంచంలో ఏ శక్తీ నన్ను అడ్డుకోలేదు: రాహుల్
ఉత్తర్ప్రదేశ్లో అత్యాచార బాధితురాలి కుటుంబాన్ని పరామర్శించేందుకు రాహుల్ నేతృత్వంలోని కాంగ్రెస్ ఎంపీల బృందం హాథ్రస్కు వెళ్లనున్నట్టు ఆ పార్టీ తెలిపింది. దుఃఖంలో ఉన్న బాధితురాలి కుటుంబసభ్యులకు ఓదార్పు అందించకుండా ప్రపంచంలో ఏ శక్తీ తమను అడ్డుకోలేదని ట్విట్టర్లో పేర్కొన్నారు రాహుల్.
ఇదీ చూడండి: అత్యాచార బాధితురాలి ఆత్మహత్య.. పోలీసులే కారణం!
