జయలలిత స్మారకం సాక్షిగా ఒక్కటైన నవజంట

తమిళనాడు దివంగత ముఖ్యమంత్రి జయలలితపై ఉన్న అభిమానాన్ని వినూత్నంగా చాటుకున్నారు అన్నాడీఎంకే నేత భవానీ శంకర్​. తన కుమారుడి వివాహాన్ని అమ్మ స్మారకం వద్ద జరిపించారు.

తమిళనాడు దివంగత నేత జయలలిత అక్కడి ప్రజల గుండెల్లో చెరగని ముద్రవేశారు. ఆమెను అమ్మగా పిలుచుకుంటారు ప్రజలు. అందుకు నిదర్శనంగా జయలలితపై అభిమానాన్ని తనదైన శైలీలో చాటుకున్నారు అన్నాడీఎంకే నేత, ఎంజీఆర్​ ఫోరమ్​ మాజీ కార్యదర్శి భవానీ శంకర్​.

అమ్మ ఆశీర్వాదం కోసం తన కుమారుడి వివాహానికి ఆమె స్మారకాన్నే పెళ్లి వేదిక చేశారు శంకర్​. కుటుంబ సభ్యులు, బంధువుల సమక్షంలో అంగరంగ వైభవంగా వివాహం చేశారు.

ఎంజీఆర్​ ఫోరమ్​ కార్యదర్శి, అన్నాడీఎంకే పార్టీ సభ్యులు గోకుల ఇంద్ర, మాజీ నగర కౌన్సిలర్​ చిన్నయన్​, ఇతర నాయకులు హాజరై నవదంపతులను ఆశీర్వదించారు. జయలలిత స్మారకం వద్ద ఇది తొలి వివాహం కావటం సంతోషంగా ఉందన్నారు గోకుల్​ ఇంద్ర. వివాహానికి సహకరించిన తమిళనాడు ముఖ్యమంత్రి, ఉపముఖ్యమంత్రికి కృతజ్ఞతలు తెలిపారు.

ఇదీ చూడండి: కన్యాకుమారి టూ కశ్మీర్​... 13 ఏళ్ల బాలుడి సైకిల్​ యాత్ర