బిహార్​ మహాకూటమిలో ఎట్టకేలకు సీట్ల సర్దుబాటు

బిహార్​లోని 40 లోక్​సభ స్థానాల్లో పోటీ చేసేందుకు మహాకూటమిలో సీట్ల సర్దుబాటు పూర్తైంది. ఆర్జేడీ 19, కాంగ్రెస్​ 9, ఇతర పార్టీలు 12 స్థానాల్లో బరిలోకి దిగనున్నాయి.

బిహార్​లో ఎవరెన్ని లోక్​సభ స్థానాల్లో పోటీ చేయాలన్న అంశంపై మహాకూటమి పార్టీలు ఎట్టకేలకు ఏకాభిప్రాయానికి వచ్చాయి. ఆర్​జేడీ 19, కాంగ్రెస్​ 9, ఆర్​ఎల్​ఎస్​పీ 5, హిందుస్థాన్​ ఆవామ్ మోర్చా 3, సీపీఐఎంఎల్​ ఒకటి,వీఐపీ 3స్థానాల్లో పోటీ చేస్తాయని ఆర్జేడీ నేత తేజస్వీ యాదవ్ పట్నాలో ప్రకటించారు.

40 నియోజకవర్గాలున్న బిహార్​లో 7 దశల్లో లోక్​సభ ఎన్నికల పోలింగ్​ జరగనుంది. తొలి రెండు దశల్లో ఓటింగ్​ జరిగే 9 స్థానాలకు మహాకూటమిలో ఇప్పటికే సీట్ల పంపకం పూర్తయింది. తాజాగా... 3 నుంచి 7వ దశ వరకు పోలింగ్​ జరిగే 31 స్థానాల్లో పోటీపైనా భాగస్వామ్యపక్షాలు ఓ అంగీకారానికి వచ్చాయి.

కాంగ్రెస్​, ఆర్జేడీ మధ్య ప్రతిష్టంభనకు కారణమైన దర్భంగాలో తమ పార్టీనే పోటీ చేస్తుందని ప్రకటించారు తేజస్వి. ప్రస్తుత దర్భంగా ఎంపీ కీర్తి ఆజాద్​ ఇటీవలే భాజపాను వీడి కాంగ్రెస్​లో చేరారు. ఆ స్థానంలో ఆర్​జేడీ సీనియర్​ నేత అబ్దుల్​ బారి సిద్దికి పోటీ చేయనున్నారు. పాటలీపుత్ర నుంచి లాలు ప్రసాద్​ యాదవ్​ పెద్ద కుమార్తె మిసా భారతి పోటీ చేయనున్నారు.

లోక్​సభ మాజీ స్పీకర్​ మీరా కుమార్​ మరోమారు ససరామ్​ నుంచి కాంగ్రెస్​ అభ్యర్థిగా అదృష్టాన్ని పరీక్షించుకోనున్నారు.