మహారాష్ట్ర శాసనసభ ఎన్నికల్లో బరిలో నిలిచే అభ్యర్థుల రెండో జాబితాను కాంగ్రెస్ పార్టీ విడుదల చేసింది. 52 మంది అభ్యర్థులతో హస్తం పార్టీ జాబితా రూపొందించింది.
రెండో జాబితాలో ఉన్న ప్రముఖుల్లో మాజీ ముఖ్యమంత్రి పృథ్వీరాజ్ చౌహాన్‌కు కరాడ్ దక్షిణం నియోజకవర్గం టికెట్ను ఖరారు చేసింది కాంగ్రెస్. ఖాళీ అయిన లోక్సభ సీట్లలో జరగనున్న ఉపఎన్నికలో సతారా సీటు నుంచి పోటీ చేయాలన్న పార్టీ విజ్ఞప్తిని చౌహాన్ తిరస్కరించారు. ఈ నేపథ్యంలో ఆయనను కరాడ్ దక్షిణం నుంచే పోటీలో నిలిపింది కాంగ్రెస్.
మాజీ ముఖ్యమంత్రి విలాస్‌ రావ్‌ దేశ్‌ముఖ్‌ కుమారుడు ధీరజ్ దేశ్‌ముఖ్‌కూ రెండో జాబితాలో చోటు దక్కింది. లాతూర్ గ్రామీణ నియోజకవర్గం నుంచి ధీరజ్ ఎన్నికల బరిలో నిలవనున్నారు. విలాస్‌రావ్‌ మరో కుమారుడు అమిత్‌.. లాతూర్ నగరం నుంచి పోటీపడనున్నారు. జాబితాలో యువరాజ్ మోహితే అనే పాత్రికేయుడికీ స్థానం దక్కింది. ఆయన ముంబయిలోని గోరేగావ్ నుంచి పోటీ పడతారు.
ఇదీ చూడండి: మహా పోరు: 125 మందితో భాజపా తొలి జాబితా
