దేశవ్యాప్త లాక్డౌన్ ఆంక్షల్లో మే 3 తర్వాత మార్పులు రానున్నాయి. రెడ్ జోన్లలో పూర్తిగా, మిగతా ప్రాంతాల్లో పాక్షికంగా వాటిని అమలు చేయాలని కేంద్ర ప్రభుత్వం యోచిస్తోంది. తెలంగాణలో మే 7 వరకు పూర్తిస్థాయి లాక్డౌన్ అమలులో ఉంటుంది.
ఆరెంజ్, గ్రీన్ జోన్లలో ఉండే కార్యాలయాలు, దుకాణాలు, పరిశ్రమలను అనుమతించడంతో పాటు.. ఆర్థిక కార్యకలాపాలతో ముడిపడిన ఇతర పనులు చేసుకోవడానికి అవకాశం ఇవ్వాలని కేంద్రం భావిస్తున్నట్లు తెలుస్తోంది. దీని ప్రకారం..
- రెడ్ జోన్లలో ఇప్పటి మాదిరిగానే అన్ని కార్యకలాపాలు పూర్తిగా నిలిపేస్తారు.
- మిగతా చోట్లా పాఠశాలలు, కళాశాలలు, సినిమా హాళ్లు, షాపింగ్‌ మాల్స్‌, ప్రార్థన స్థలాల మూసివేత కొనసాగుతుంది.
- మత, రాజకీయ, క్రీడా కార్యకలాపాలపైనా నిషేధం ఉంటుంది.
- బస్సులు, రైళ్లు, విమానాలరాకపోకలు ఉండవు.
- మిగతా ఆర్థిక వ్యవహారాలను కేంద్ర వైద్య ఆరోగ్యశాఖ జారీ చేసిన మార్గదర్శకాలకు లోబడి అనుమతించనున్నారు.
- ప్రజలు తాము పనిచేసే చోటుకు వ్యక్తిగత వాహనాలపై వెళ్లి రావడానికి వీలు కల్పించనున్నారు. సంస్థలు ఏర్పాటుచేసే వాహనాల్లో సామాజిక దూరం పాటిస్తూ రాకపోకలు సాగించడానికీ అవకాశం ఇవ్వనున్నారు.
కేబినెట్‌లో భేటీ తర్వాత..
ఆర్థిక కార్యకలాపాలను నడుపుతూనే కరోనాపై పోరాటం చేయాలన్న ప్రధానమంత్రి అభిప్రాయాన్ని ఆచరణలో పెట్టేలా వెసులుబాట్లు ఇవ్వాలని కేంద్రం భావిస్తోంది. రాజ్‌నాథ్‌సింగ్‌ నేతృత్వంలో మంగళవారం జరిగే మంత్రివర్గ బృందం (జీవోఎం) సమావేశంలో, బుధవారం కేబినెట్‌ సమావేశంలో దీనిపై లోతుగా చర్చించి ప్రభుత్వం మరింత స్పష్టతకు రానుంది.
రాష్ట్రాల, బడుగు వర్గాల ఆర్థిక ఇబ్బందులను దృష్టిలో ఉంచుకొని తదుపరి కార్యాచరణ చేపట్టాలని ప్రభుత్వం యోచిస్తోంది. వలస కార్మికులను సొంత ఊళ్లకు తరలించడంపైనా ఒక నిర్ణయం తీసుకొనే అవకాశం కనిపిస్తోంది. ఏ పనికి అనుమతి ఇచ్చినా భౌతిక దూరం పాటించడం, మాస్కులు ధరించడం తప్పనిసరి కానుంది.
ఇదీ చూడండి: భళా ఈశాన్య భారతం- కరోనా రహితంగా ఆ ఐదు రాష్ట్రాలు
