ప్రపంచ ప్రఖ్యాత గణాంక శాస్త్రవేత్త, పద్మవిభూషణ్ ప్రొఫెసర్ కల్యంపూడి రాధాకృష్ణరావు (సీఆర్ రావు) గురువారం వందో పుట్టిన రోజు జరుపుకొంటున్నారు. ఇండియన్ స్టాటిస్టికల్ ఇన్స్టిట్యూట్ డైరెక్టర్గా పదవీ విరమణ చేసిన అనంతరం అమెరికాలో స్థిరపడిన ఆయన ప్రస్తుతం యూనివర్సిటీ ఆఫ్ బఫలోలో రీసెర్చ్ ప్రొఫెసర్గా సేవలందిస్తున్నారు.
భారత్ స్టాటిస్టిక్ రంగానికి ఆయన చేసి సేవలను గుర్తుచేసుకుంటూ భారత్ సైన్స్ అండ్ టెక్నాలజీ శాఖ బుధవారం సాయంత్రం వెబినార్ ద్వారా నిర్వహించిన సింపోజియంలో దేశవిదేశాలకు చెందిన పలువురు శాస్త్రవేతలు ఆయనకు అభినందనలు తెలిపారు. సీఆర్ రావు సేవలు కేవలం స్టాటిస్టికల్ రంగానికే కాకుండా ఎకనమిక్స్, జెనిటిక్స్, ఆంత్రోపాలజీ తదితర రంగాలకూ విశేషంగా ఉపయోగపడినట్లు బుధవారం నాటి వెబినార్లో పాల్గొన్న శాస్త్రవేత్తలు పేర్కొన్నారు.
విద్యార్థిగా చేరి డైరెక్టర్గా..
హైదరాబాద్లోని సీఆర్రావు అడ్వాన్స్డ్ ఇన్స్టిట్యూట్ ఆఫ్ మ్యాథమెటిక్స్, స్టాటిస్టిక్స్ అండ్ కంప్యూటర్స్ సైన్స్ వ్యవస్థాపకులైన సీఆర్ రావు 1920 సెప్టెంబర్ 10న బళ్లారి జిల్లా హడగళిలో జన్మించారు. తర్వాత ఆంధ్రప్రదేశ్లోని గూడూరు, నూజివీడు, నందిగామల్లో ఆయన బాల్యం గడిచింది. ఆంధ్రా విశ్వవిద్యాలయం నుంచి ఎమ్మెస్సీ మ్యాథమెటిక్స్ చేసిన ఆయన యూనివర్సిటీ ఆఫ్ కోల్కతాలో ఎంఏ స్టాటిస్టిక్స్ చేశారు. కేంబ్రిడ్జి విశ్వవిద్యాలయంలోని కింగ్స్ కాలేజీలో 1948లో పీహెచ్డీ పూర్తిచేశారు. ఇండియన్ స్టాటిస్టికల్ ఇన్స్టిట్యూట్ విద్యార్థిగా చేరి అదే సంస్థకు డైరెక్టర్గా ఎదిగారు.
39 డాక్టరేట్లు..
19 దేశాల నుంచి 39 డాక్టరేట్లు అందుకున్న ఆయన ఇప్పటి వరకు 477 పరిశోధన పత్రాలు సమర్పించారు. 15 పుస్తకాలు రాశారు. 2002లో అమెరికా అధ్యక్షుడు జార్జ్బుష్ చేతులమీదుగా ఆ దేశ అత్యున్నత నేషనల్ మెడల్ ఆఫ్ సైన్స్ పురస్కారం అందుకున్నారు. యూకే ఇంటర్నేషనల్ స్టాటిస్టికల్ ఇన్స్టిట్యూట్, ఇన్స్టిట్యూట్ ఆఫ్ మ్యాథమెటికల్ సైన్స్, ఇంటర్నేషనల్ బయోమెట్రిక్ సొసైటీకి అధ్యక్షుడిగా పని చేశారు. భారత స్టాటిస్టిక్స్ రంగానికి చేసిన సేవలకు గుర్తింపుగా ప్రొఫెసర్ రావును భారత ప్రభుత్వం 1968లో పద్మభూషణ్, 2001లో పద్మవిభూషణ్తో సత్కరించింది.
ఇదీ చూడండి: 'పీవీతో పాటు ఆయనకూ భారతరత్న ఇవ్వాలి'
