అతిపెద్ద నిర్బంధ కేంద్రం.. డిసెంబర్​ కల్లా పూర్తి

అసోం గోల్​పరా జిల్లా మటియాలో దేశంలోనే అతిపెద్ద నిర్బంధ కేంద్రాన్ని నిర్మిస్తోంది ప్రభుత్వం. ఈ కేంద్రం డిసెంబర్​ కల్లా పూర్తవుతుందని అధికారులు తెలిపారు.

అక్రమ వలసదారులకోసం దేశంలోనే అతి పెద్ద నిర్బంధ కేంద్రాన్ని అసోంలోని గోల్‌పరా జిల్లాలో నిర్మిస్తున్నారు. ఈ కేంద్రం 28వేల చదరపు అడుగుల విస్తీర్ణంతో ఉంటుంది. కేంద్ర హోంమంత్రిత్వశాఖ ఈ నిర్మాణానికి అనుమతి ఇచ్చింది.

గోల్​పరా జిల్లాలోని మటియా ప్రాంతంలో ఈ నిర్మాణం శరవేగంగా జరుగుతోంది. డిసెంబర్​ కల్లా పూర్తి అవుతుందని అధికారులు తెలిపారు. ఈ కేంద్రం నిర్మాణం కోసం హోంశాఖ రూ.46.5 కోట్లు వెచ్చించింది.

కనీసం 3 వేల మంది ఆవాసం ఉండే విధంగా 15 అంతస్తుల భవనం, పాఠశాలలు, ఆసుపత్రులు, సమావేశ మందిరాలు, 7 ఫుట్​​బాల్ ​కోర్టులు, 180 మరుగుదొడ్లు ఇలా అన్ని సౌకర్యాలు ఉండే విధంగా దీనిని నిర్మిస్తున్నారు.

ఆగస్టు 31న ప్రభుత్వం ప్రకటించిన అసోం జాతీయ పౌర జాబితా (ఎన్​ఆర్​సీ) లో 19 లక్షల మంది పేర్లు నమోదు కాలేదు. ఎన్​ఆర్​సీలో పేరు నమోదు కానీ వారు సరైన పత్రాలు చూపించి నమోదు చేసుకోవాలని సూచించింది కేంద్రం. ఇందుకోసం 120 రోజులు గడువు ఇచ్చింది.

రాష్ట్రవ్యాప్తంగా ఉన్న 6 తాత్కాలిక నిర్బంధ కేంద్రాలలో 1136 మంది బందీలు ఉన్నారు. గత నెలలో సుప్రీం ఇచ్చిన బెయిల్​ మేరకు 9 మందిని విడుదల చేశారు. మరో 25 మంది ఆరోగ్యకారణాలతో మరణించారు.

ఇదీ చూడండి:వర్సిటీల్లో కుల వివక్షపై కేంద్రానికి సుప్రీం నోటీసులు