లోక్పాల్ కమిటీ ఆహ్వానాన్ని మరోసారి తిరస్కరించారు కాంగ్రెస్ సీనియర్ నేత మల్లికార్జున ఖర్గే. సమావేశానికి కచ్చితంగా హాజరు కావాలనే ప్రత్యేక నిబంధనేమీ లేదని ఆయన వ్యాఖ్యానించారు.
గతేడాది ఫిబ్రవరి నుంచి ఇప్పటి వరకు ఏడుసార్లు ఆహ్వానాన్ని తిరస్కరించారు ఖర్గే. ప్రధాన ప్రతిపక్షం కాంగ్రెస్ తరఫునలోక్పాల్ చట్టానికి తాను ప్రతిపాదించిన సవరణలపై కేంద్రం ఎటువంటి చర్యలు తీసుకోకపోవటం వల్లే సమావేశ ఆహ్వానాన్ని తిరస్కరిస్తున్నట్లు ప్రధాని మోదీకి లేఖ రాశారు ఖర్గే.
లోక్పాల్ చట్టంలోని సెక్షన్ 4, 2013 ప్రకారం... సమావేశానికి తప్పనిసరిగా హాజరు కావాలనే ప్రత్యేక నిబంధనేమీ ఏమీ లేదని ఆయన లేఖలో పేర్కొన్నారు.
ఐదు సంవత్సరాలుగా లోక్పాల్ను నియమించకపోవటానికి సమావేశాలకు తన గైర్హాజరే కారణమని భాజపా మంత్రులు ప్రచారం చేస్తున్నారని ఖర్గే ఆగ్రహం వ్యక్తం చేశారు. అందుకే తప్పనిసరిగా హాజరు నిబంధనను ఆయన ప్రస్తావించారు. అయితే సుప్రీం ఒత్తిడితో చివరికి లోక్పాల్ సభ్యుల నియామకానికి కేంద్రం చర్యలు చేపట్టిందని వ్యాఖ్యానించారు ఖర్గే.
ప్రతిపక్షాల పాత్ర లేకుండా లోక్పాల్ నియామకాల విషయంలో కేంద్రం ఏకపక్షంగా వ్యవహరిస్తే అది అక్రమమని ఖర్గే హెచ్చరించారు. ప్రతిపక్షం ఆమోదం లేకుండా జరిగే నియమాకాలు చెల్లవని ఆయన అన్నారు.
