క్షణానికో మలుపు తిరిగే కన్నడ రాజకీయంలో తాజాగా స్పీకర్ రమేశ్ కుమార్ రాజీనామా చేశారు. యడ్యూరప్ప బలపరీక్షలో గెలిచిన వెంటనే తన నిర్ణయాన్ని సభలో ప్రకటించారు.
"నేను సభాపతి బాధ్యతల నుంచి వైదొలగాలని నిర్ణయించుకున్నాను. రాజీనామా చేస్తున్నాను. స్పీకర్ పదవికి ఎలాంటి మచ్చ రాకుండా నా శక్తి మేర పని చేశాను." - రమేశ్ కుమార్, సభాపతి
రమేశ్ కుమార్... కాంగ్రెస్-జేడీఎస్ హయాంలో స్పీకర్గా ఎన్నికయ్యారు. ఇప్పుడు ప్రభుత్వం మారాక... తాను ఆ పదవిలో కొనసాగడం భావ్యంకాదని ఆయన అనుకున్నారని సమాచారం. కూటమి ప్రభుత్వ పతనానికి కారణమైన వారిపై చర్యలు తీసుకోవడం వల్ల తన బాధ్యత పూర్తయినట్లు రమేశ్ భావించారని తెలుస్తోంది. రాజీనామా లేఖను డిప్యూటీ స్పీకర్కు అందజేశారు.
అన్నీ సంచలనాలే...
రాజకీయ ప్రకంపనలకు కారణమైన అసమ్మతి ఎమ్మెల్యేలపై స్పీకర్ రమేశ్ కొరడా ఝుళిపించారు. మొత్తం 17 మంది ఎమ్మెల్యేలపై అనర్హత వేటు వేశారు. భాజపా ప్రభుత్వం ఏర్పాటు చేస్తే మంత్రిపదవులు వస్తాయని ఆశించిన రెబల్ ఎమ్మెల్యేలకు స్పీకర్ నిర్ణయంతో భంగపాటు తప్పలేదు.
రెబల్ ఎమ్మెల్యేలు తమ రాజీనామాలపై సుప్రీం కోర్టును ఆశ్రయించినప్పుడూ స్పీకర్ ఎలాంటి తొందరపాటు లేకుండా చాకచక్యంగా వ్యవహరించారు.
