దేశంలో కరోనా కేసులు అంతకంతకూ పెరిగిపోతున్న తరుణంలో.. వైరస్ వ్యాప్తిని అరికట్టేందుకు మరోసారి లాక్డౌన్ విధిస్తున్నట్లు ఆయా రాష్ట్రాలు ప్రకటించాయి. కర్ణాటకలోని బెంగళూరు సహా అసోం, అరుణాచల్ ప్రదేశ్, మేఘాలయల్లో లాక్డౌన్ను విధిస్తున్నట్లు తెలిపాయి అక్కడి ప్రభుత్వాలు. కొన్ని రాష్ట్రాల్లో లాక్డౌన్ కొనసాగుతుండగా.. ఆ తేదీలను మరికొద్ది రోజులపాటు పొడిగిస్తున్నట్లు స్పష్టం చేశాయి.
కర్ణాటకలో మళ్లీ..
బెంగళూరు నగరంలో జులై 14 నుంచి వారం రోజులపాటు పూర్తిస్థాయి లాక్డౌన్ అమల్లో ఉంటుదని ప్రకటించింది కర్ణాటక ప్రభుత్వం. రాష్ట్రంలో వైరస్ వ్యాప్తిని అరికట్టేందుకే నిపుణుల సలహా మేరకు ఈ నిర్ణయం తీసుకున్నామని సీఎం బీఎస్ యడియూరప్ప తెలిపారు.
అసోంలో పొడిగింపు..
అసోంలోని గువహటిలో కొనసాగుతోన్న లాక్డౌన్ను మరో వారం పాటు పొడిగిస్తున్నట్లు రాష్ట్ర సర్కార్ తెలిపింది. ఈ నిబంధనలు జులై 12 నుంచి అమల్లోకి రానున్నాయని ప్రకటించింది. రాష్ట్రంలో 14 రోజుల లాక్డౌన్ ఆదివారంతో ముగియనుండగా.. ఈ మేరకు నిర్ణయం తీసుకున్నట్లు రాష్ట్ర ప్రధాన కార్యదర్శి సంజయ్ కృష్ణ తెలిపారు.
అరుణాచల్ ప్రదేశ్లో..
అరుణాచల్ ప్రదేశ్లో కొవిడ్ కేసులు పెరుగుతున్న దృష్ట్యా.. జులై 20న ఉదయం 5 గంటల వరకు రాజధాని ఇటానగర్ ప్రాంతంలో లాక్డౌన్ అమల్లో ఉంటుందని సీఎస్ నరేశ్ కుమార్ తెలిపారు. ముఖ్యమంత్రి పెమా ఖండు అధ్యక్షతన జరిగిన మంత్రివర్గం సమావేశంలో ఈ మేరకు నిర్ణయం తీసుకున్నట్లు చెప్పారు.
ఉత్తరాఖండ్లో 3 రోజులు..
ఉత్తరాఖండ్- ఉధమ్సింగ్ నగర్లోని కాశీపుర్లో శుక్రవారం ఒక్కరోజే 41 కేసులు నమోదయ్యాయి. ఈ నేపథ్యంలో అక్కడ శనివారం నుంచి మూడు రోజుల పాటు పూర్తిస్థాయి లాక్డౌన్ అమల్లోకి రానుంది.
కశ్మీర్లో అలా..
జమ్ము కశ్మీర్లో వైరస్ వ్యాప్తి అధికమవుతోన్న తరుణంలో.. రాజౌరి జిల్లాలోని కొన్ని ప్రాంతాల్లో శనివారం నుంచి కఠిన లాక్డౌన్ ఆంక్షలు అమల్లోకి రానున్నాయి. రాజౌరి పరిసర ప్రాంతాలన్నీ మూతపడగా.. ప్రజలు ఇంటివద్ద నుంచి బయటకు రావొద్దని కోరారు అక్కడి అధికారులు.
నాగాలాండ్లో నెలాఖరు వరకు..
నాగాలాండ్లో కొనసాగుతోన్న లాక్డౌన్ ఈ నెల 16 తో ముగియనుండగా.. జులై 31 వరకు పొడిగించాలని రాష్ట్ర సర్కార్ నిర్ణయించింది. పెరుగుతోన్న కరోనా వ్యాప్తిని సమీక్షించిన అనంతరం ఈ నిర్ణయం తీసుకున్నట్లు ప్రణాళిక, సమన్వయ మంత్రి నెయిబా క్రోనూ తెలిపారు.
మేఘాలయలో రెండు రోజులు..
మేఘాలయ రాజధాని షిల్లాంగ్లో సోమవారం నుంచి మరో రెండురోజుల పాటు లాక్డౌన్ అమల్లో ఉంటుందని ఆ రాష్ట్ర సీఎం కాన్రాడ్ సంగ్మా తెలిపారు. కొవిడ్-19 మార్గదర్శకాలను పాటించడం సహా, పౌరుల ప్రవర్తనలో మార్పులు తెచ్చేందుకే ఈ నిర్ణయం తీసుకున్నట్లు సంగ్మా వివరించారు.
బంగాల్లో మరో వారం..
పశ్చిమ్ బంగాలో 23 జిల్లాలోని 20 కంటైన్మెంట్ జోన్లలో గురువారం నుంచి వారం రోజుల వరకు లాక్డౌన్ విధిస్తున్నట్లు రాష్ట్ర ప్రభుత్వం నిర్ణయించింది.
ఉత్తర్ప్రదేశ్లో కర్ఫ్యూ..
యూపీలో శుక్రవారం రాత్రి 10 గంటల నుంచి సోమవారం ఉదయం 5 గంటల వరకు కర్ఫ్యూ అమల్లోకి తెచ్చింది యోగి ప్రభుత్వం. వైరస్ వ్యాప్తి ప్రాంతాలను గుర్తించేందుకే ఆంక్షలు విధించినట్లు ఆ రాష్ట్ర ప్రధాన కార్యదర్శి ఆర్కే తివారీ తెలిపారు.
మాస్క్ లేకుండా బయటకు వచ్చిన వారికి నిబంధనల ఉల్లంఘనల కింద రూ.500 జరిమానా విధిస్తామని గౌతమ్ బుద్ధ్ నగర్ పాలనా యంత్రాంగం హెచ్చరించింది.
ఇదీ చదవండి: వజ్రాల మాస్క్ పెట్టుకోవాల.. ప్రత్యేక ఆకర్షణగా నిలవాల!
