మొన్నటిదాకా రోజుకో మలుపు తిరగుతూ అందరి దృష్టినీ ఆకర్షించిన కర్ణాటక రాజకీయాలు... తాజాగా మరోసారి రసవత్తరంగా మారాయి. సంకీర్ణ ప్రభుత్వాన్ని ఏర్పాటు చేసిన కాంగ్రెస్-జేడీఎస్ పార్టీ అగ్రనేతలు ట్విట్టర్ వేదికగా ఒకరిపై మరొకరు విమర్శనాస్త్రాలు సంధించుకుంటున్నారు. కాంగ్రెస్ సీనియర్నేత మల్లిఖార్జున ఖర్గేపై ముఖ్యమంత్రి హెచ్.డీ కుమారస్వామి చేసిన వ్యాఖ్యలే ఇందుకు కారణం.
ఎన్నో ఏళ్లుగా కాంగ్రెస్ పార్టీకి సేవలందిస్తోన్న ఖర్గేకు పార్టీ అధినేతలు అత్యున్నత పదవిని అందించాలన్నారు కుమారస్వామి. ఈ వ్యాఖ్యలు కర్ణాటక కాంగ్రెస్ అధినేత సిద్ధరామయ్యను ఉద్దేశించి అన్నారని భావించాయి ఆ పార్టీ వర్గాలు. కాంగ్రెస్ పార్టీ ముఖ్యమంత్రి అభ్యర్థిగా సిద్ధరామయ్యను కాదని ఖర్గేను దించాలని చెప్పడానికే కుమారస్వామి ఈ వ్యాఖ్యలు చేశారన్నాయి. ఈ నేపథ్యంలో కుమారస్వామి వ్యాఖ్యలపై స్పందించారు సిద్ధరామయ్య. సమయం వస్తే ఎవరైనా ఏ పదవినైనా అధిరోహించొచ్చని ట్వీట్ చేశారు.
"కుమారస్వామి ఏం చెప్పారో అది నిజమే. ముఖ్యమంత్రితో పాటు అంతకన్నా ఎక్కువ హోదా ఉన్న పదవుల్లో ఉండే సత్తువ మల్లిఖార్జున ఖర్గేకు ఉంది. కాంగ్రెస్, జేడీఎస్ ఇరుపార్టీల్లోనూ ముఖ్యమంత్రి పదవి చేపట్టగలిగే నేతలు కొంతమంది ఉన్నారు. హెచ్.డీ రేవన్న కూడా వారిలో ఒకరు. దేనికైనా సమయం రావాలి."
-సిద్ధరామయ్య, కాంగ్రెస్ సీనియర్ నేత
అయితే తాను రాజకీయలబ్ధి కోసం ఈ వ్యాఖ్యలు చేయలేదని ట్వీట్ చేశారు కుమారస్వామి.
"ఈ ప్రకటన ద్వారా రాజకీయ లబ్ధి పొందాలన్న కోరిక నాకు లేదు. పార్టీకి ఖర్గే అందించిన సేవలను మనం మర్చిపోకూడదు."
- హెచ్డీ కుమారస్వామి, కర్ణాటక ముఖ్యమంత్రి
ఇదీ చూడండి : ఖర్గే ఎప్పుడో సీఎం కావాల్సింది:కుమారస్వామి
