యూపీ ఉప్పు-రొట్టె వీడియో తీసిన జర్నలిస్ట్​పై కేసు

ఉత్తర్​ప్రదేశ్​లో సర్కారు మధ్యాహ్న భోజనంలో పిల్లలకు పోషకాహారం బదులుగా రొట్టె ఉప్పుతో సరిపెట్టిన దృశ్యాలు వైరల్​ అయ్యాయి. ఈ వీడియో రికార్డు చేసిన జర్నలిస్టు పవన్​కుమార్ జైస్వాల్​పై రాష్ట్ర పోలీసులు ఎఫ్​ఐఆర్​ నమోదు చేశారు.

కొద్దివారాల క్రితం ఉత్తర్​ప్రదేశ్​లో మధ్యాహ్న భోజన పథకంలో భాగంగా ప్రభుత్వ పాఠశాలలో పిల్లలకు రొట్టెలు, కూరతో కూడిన పోషకాహారానికి బదులుగా రొట్టెలు-ఉప్పు అందించారు. ఈ వీడియో చిత్రీకరించిన స్థానిక జర్నలిస్టు జైస్వాల్​పై పోలీసులు కేసు నమోదు చేశారు.

వార్త రాసిన జర్నలిస్టు రాష్ట్ర ప్రభుత్వ కీర్తిని అప్రతిష్టపాలు చెయ్యడానికి అసత్య ప్రచారం చేశారని స్థానిక అధికారి పోలీసులకు ఫిర్యాదు చేశారు.

జైస్వాల్​పై ఫిర్యాదు

​జర్నలిస్ట్​ పవన్​ జైస్వాల్​పై స్థానిక కలెక్టర్ ఆదేశాలమేరకు మీర్జాపూర్​ బ్లాక్​ విద్యాశాఖాధికారి ప్రేమ్ శంకర్​ రామ్.. అరూరా పోలిస్​ స్టేషన్​లో ఫిర్యాదు చేశారు. షియుర్​ ప్రాథమిక పాఠశాలలో మధ్యాహ్న భోజన పథకంలో రొట్టెలను వండారని... కానీ అందులోకి కూరలు వండలేదని, కావాల్సిన ఏర్పాట్లు చెయ్యాల్సింది మానేసి గ్రామ సర్పంచ్ అనుచరుడు రాజ్​కుమార్​ పాల్​... జర్నలిస్ట్​ పవన్​ను పిలిపించి కుట్రపూరితంగా వీడియో తీయించారని ఫిర్యాదులో పేర్కొన్నారు. ఈ ఘటనకు సంబంధించి జైస్వాల్‌పై నేరపూరిత కుట్ర, మోసం కింద పవన్ కేసు నమోదు చేశారు.

వార్త సృష్టించింది కాదు

ఈ వార్త ఉద్దేశపూర్వకంగా తీసింది కాదని, ఒకసారి వార్తను చూసి నిర్ధరణ చేసుకోవాలని జైస్వాల్ అన్నారు. ఈ ఘటనకు సంబంధించి ప్రతి విషయాన్ని అధికారులకు తెలియజేసినట్లు తెలిపారు. తనపై వచ్చిన ఆరోపణలను ఖండించారు.

వీడియోలో ఏముంది?

పాఠశాలలోని పిల్లలు రొట్టెలో కూరగాయలకు బదులుగా ఉప్పును వేసుకుని తింటున్న దృశ్యాలను పవన్​ వీడియో తీశారు. ఇటీవల ఆగస్టు 22న ఈ ఘటన జరిగింది. వీడియో కొద్దిసేపటికే సామాజిక మాధ్యమాల్లో వైరల్​ అయ్యింది. నెటిజన్లు, మీడియా నుంచి ప్రభుత్వ పాఠశాలల్లో పిల్లలకు పోషకాహారం లభించడంలేదనే ఆరోపణలు వెల్లువెత్తాయి.

జాతీయ మానవ హక్కుల కమిషన్ ఈ విషయంపై స్పందించింది. మధ్యాహ్న భోజన పథకంపై సమగ్ర నివేదిక ఇవ్వాలంటూ రాష్ట్ర కార్యదర్శికి నోటీసు పంపింది.

భావ ప్రకటన స్వేచ్ఛకు భంగం

జర్నలిస్టుపై ఎఫ్​ఐఆర్​ నమోదు చెయ్యడాన్ని ఖండిస్తూ, ఇలాంటి చర్యలు పాత్రికేయ స్వేచ్ఛపై దాడి చేసినట్లేనని సమాజ్​వాదీ పార్టీ ఆరోపించింది. భారతదేశంలో ప్రతిఒక్కరికీ సమానమైన భావ ప్రకటన స్వేచ్ఛ ఉందని సమాజ్​వాద్​ పార్టీ అధినేత అఖిలేష్​ యాదవ్​ ట్విట్టర్​లో పేర్కొన్నారు.

కేసు సరికాదన్న విద్యామంత్రి

జైస్వాల్​పై కేసు నమోదు చేసిన ఘటన పట్ల ఉత్తరప్రదేశ్​ ప్రాథమిక విద్యా మంత్రి సతీష్​ ద్వివేది స్పందించారు. వాస్తవాలు, అవినీతిని బైటపెట్టే జర్నలిస్టుపై కేసు పెట్టడం సరికాదన్నారు. కేసు ఏ ప్రాతిపదికపైన పెట్టారో స్థానిక ఎస్పీని వివరాలు అడిగి తెలుసుకుని స్పందిస్తామన్నారు.

ఇదీ చూడండి:దిల్లీలో కుప్పకూలిన 4 అంతస్తుల భవనం