ఉగ్రవాదులు, దేశద్రోహులు అంతర్జాలాన్ని దుర్వినియోగం చేసే అవకాశం ఉన్నందునే జమ్ము కశ్మీర్లో సాధారణ ప్రజలు, మీడియాకు ఇంటర్నెట్ సేవలను అందుబాటులోకి తీసుకురాలేదని ప్రభుత్వ యంత్రాంగం స్పష్టం చేసింది.
సుప్రీంకోర్టు ఆదేశాల నేపథ్యంలో 2జీ ఇంటర్నెట్ సేవలను పునఃప్రారంభించింది జమ్ముకశ్మీర్ ప్రభుత్వం. మొత్తం ఐదు జిల్లాల పరిధిలోని ఆస్పత్రులు, బ్యాంకులు, హోటళ్లులకు పోస్ట్ పెయిడ్ సహా బ్రాడ్ బ్యాండ్ సేవలను పునరుద్ధరిస్తున్నట్లు హోంశాఖ ముఖ్య కార్యదర్శి షాలీనా కాబ్రా ఆదేశాలు జారీ చేశారు. అయితే మొబైల్ ఇంటర్నెట్ను మాత్రం తిరిగి ప్రారంభించలేదు.
ఎందుకంటే?
అంతర్జాలం ద్వారా ప్రజలకు తప్పుడు వార్తలు పంపించి ఉగ్రవాదంవైపు మొగ్గుచూపేలా ముష్కరులు ప్రయత్నాలు చేస్తున్నారనే సమాచారం అందినట్లు హోంశాఖ ప్రధాన కార్యదర్శి షాలీన్ కాబ్రా తెలిపారు. అంతర్జాలం పునరుద్ధరించడం ద్వారా వేర్పాటువాదులు సమాచారాన్ని ఎప్పటికప్పుడు పంచుకునే అవకాశం ఉందని వెల్లడించారు. ఈ కారణంగానే కశ్మీర్ డివిజన్లో మొబైల్ అంతర్జాల సేవలను పునరుద్ధరించలేదని స్పష్టం చేశారు.
పాక్షికంగానే..
మరోవైపు పునరుద్ధరించిన అంతర్జాల సేవలను సైతం పరిమితంగానే అందించాలని ఇంటర్నెట్ సర్వీస్ ప్రొవైడర్లను అధికారులు ఆదేశించారు. పునరుద్ధరించిన ప్రాంతాల్లో అంతర్జాలం దుర్వినియోగం కాకుండా జాగ్రత్త వహించాలని సూచించారు. అయితే సామాజిక మాధ్యమాలపై ఉన్న నిషేధాన్ని కొనసాగిస్తున్నారు.
పర్యటకుల భావోద్వేగం
కశ్మీర్లో పర్యటిస్తున్న కొందరు మలేసియా దేశీయులు.. చాలా రోజుల తర్వాత ఇంటర్నెట్ పొందటంపై ఆనందం వ్యక్తం చేశారు. ఈనెల 11న కశ్మీర్ వచ్చిన వారికి బుధవారం తొలిసారి ఇంటర్నెట్ పొందేందుకు అనుమతించారు అధికారులు. ఈ క్రమంలో తమవారితో వీడియో కాలింగ్ చేసి.. తల్లిదండ్రులు, పిల్లలతో నేరుగా మాట్లాడే అవకాశం రావటంపై భావోద్వేగానికి లోనయ్యారు.
