మహాత్మా గాంధీకి సంబంధించిన ప్రదేశాలతో పాటు గుజరాత్, మధ్యప్రదేశ్ల్లోని పర్యాటక ప్రాంతాలకు కలిపి ఐఆర్సీటీసీ భారత్ దర్శన్ టూరిస్ట్ ప్యాకేజీని ప్రారంభిస్తోంది. ఈ ప్రత్యేక ప్యాకేజీ సెప్టెంబర్ 27 నుంచి ప్రారంభమవుతుందని రైల్వే పర్యటక, క్యాటరింగ్శాఖ తెలిపింది.
ఈ టూరిస్టు ప్యాకేజీ ద్వారా.. గాంధీజీ జన్మస్థలమైన పోర్బందర్, అహ్మదాబాద్లోని సబర్మతి ఆశ్రమాన్ని దర్శించవచ్చు. అలాగే వడోదరలోని ప్రపంచంలోనే అతి ఎత్తైన వల్లభాయ్ ఐక్యతా విగ్రహాన్ని సందర్శించవచ్చు.
పర్యటన ఇలా..
ఈ పర్యటన ఎనిమిది రాత్రులు, తొమ్మిది పగళ్లు కొనసాగుతుంది. మధ్యప్రదేశ్లోని రేవా నుంచి ఈ పర్యటన ప్రారంభమవుతుంది. ఇండోర్ (ఓంకారేశ్వర్), ఉజ్జయిని (మహా కాళేశ్వర్), అహ్మదాబాద్, ద్వారక, పోర్బందర్, సోమనాథ్గా సాగి చివరకు వడోదర (ఐక్యతా విగ్రహం) వద్ద ముగుస్తుంది.
మార్గమిలా..
రేవా-సత్నా- మైహార్- కట్ని- జబల్పూర్- నర్సింగ్పూర్- పిపారియా- ఇటార్సి- హోషంగాబాద్- హబీబ్గంజ్- సెహోర్- షుజల్పూర్- మక్సీ- దేవాస్- ఇండోర్- ఉజ్జయిని- అహ్మదాబాద్- ద్వారకా- పోర్బందర్- సోమనాథ్-వడోదర.... ఇది పూర్తయిన తరువాత తిరుగు విహారయాత్ర కొనసాగుతుంది.
అందుబాటు ధరలో...
ఈ పర్యాటక ప్యాకేజీలో స్లీపర్ క్లాస్లో ఒక్కో వ్యక్తికి రూ.8,505 ఉంటుంది. థర్డ్ ఏసీకి అయితే రూ.10,395లు ఉంటుంది. పర్యటకులకు ప్రత్యేక గది, స్వచ్ఛమైన శాఖాహార భోజనం, పర్యటక ప్రదేశాలను దర్శించడానికి బస్సులు, భద్రతా ఏర్పాట్లు ఉంటాయి.
ఇదీ చూడండి: అక్టోబర్ 2న సబర్మతీ ఆశ్రమానికి ప్రధాని మోదీ!
