దేశవ్యాప్తంగా లాక్డౌన్ కొనసాగుతున్న వేళ నిత్యావసర వస్తువుల లభ్యతపై దృష్టి సారించింది కేంద్ర ప్రభుత్వం. నిత్యావసర సరకుల అక్రమ నిల్వ, బ్లాక్ మార్కెట్కు పాల్పడే వారిపై కఠిన చట్టాలను అమలు చేయాలని రాష్ట్రాలు, కేంద్ర పాలిత ప్రాంతాలను కోరింది. ఉత్పత్తి నిలిచిపోయి, కార్మికుల కొరత ఏర్పడ్డ సమయంలో బ్లాక్ మార్కెటింగ్ను ఉపేక్షించకూడదని స్పష్టం చేసింది.
ఈ మేరకు రాష్ట్రాలు, కేంద్ర పాలిత ప్రాంతాల ముఖ్య కార్యదర్శులకు లేఖ రాశారు కేంద్ర హోంశాఖ కార్యదర్శి అజయ్ భల్లా. 21 రోజుల లాక్డౌన్ సమయంలో విపత్తు నిర్వహణ చట్టం కింద.. నిత్యావసరాలు, మందులు, వైద్య సామగ్రికి సంబంధించి ఉత్పత్తి, సరఫరాను అనుమతించాలని కోరారు. కార్మికుల కొరతపై దృష్టి సారించి ఉత్పత్తిని పెంచాలని సూచించారు.
" ఈ పరిస్థితుల్లో అక్రమ నిల్వ, బ్లాక్ మార్కెట్, ధరలు పెంచే అవకాశం ఉంది. అలాంటి చర్యలను ఉపేక్షించకూడదు. నిత్యావసర వస్తువుల చట్టం(ఈసీ) 1955 నియమాల ప్రకారం అవసరమైన వస్తువులను అందుబాటులో ఉంచేందుకు తక్షణం చర్యలు తీసుకోవాలి. ఇందులో వస్తువుల స్టాక్ నిల్వలపై పరిధి, ధరల నియంత్రణ, ఉత్పత్తి పెంచటం, డీలర్ల ఖాతాలను తనిఖీ చేయటం వంటివి చేపట్టాలి. "
- అజయ్ భల్లా, కేంద్ర హోంశాఖ కార్యదర్శి.
ఈసీ చట్టం నియమాలను ఉల్లంఘించిన వారికి 7 ఏళ్ల జైలు శిక్ష, జరిమానాతో పాటు రెండూ విధించే అవకాశం ఉందని హెచ్చరించారు భల్లా. బ్లాక్ మార్కెట్ నిరోధం, నిత్యావసర వస్తువుల సరఫరా చట్టం 1980 కింద నేరస్థులను అదుపులోకి తీసుకోవచ్చని రాష్ట్రాలకు సూచించారు. సరసమైన ధరల్లో వస్తువులను ప్రజలకు అందుబాటులో ఉంచాలని కోరారు.
ఇదీ చూడండి: ఆ దుకాణంలో అమ్మేవాళ్లు లేరు... కానీ కొనుక్కోవచ్చు!
