కరోనా వైరస్ నేపథ్యంలో విదేశాల నుంచి భారత్కు వచ్చే ప్రయాణికుల కోసం దిల్లీ ఇంటర్నేషనల్ ఎయిర్పోర్ట్ లిమిటెడ్(డీఐఏఎల్) సరికొత్త వెసులుబాటును ప్రవేశపెట్టింది. కాంటాక్ట్లెస్ ప్రక్రియలో భాగంగా.. విదేశాల నుంచి భారత్కు చేరుకునే వారు అందించాల్సిన స్వీయ ధ్రువీకరణ పత్రాన్ని ఆన్లైన్లోనే నింపొచ్చని తెలిపింది. ఇన్స్టిట్యూషనల్ క్వారంటైన్ ప్రక్రియ నుంచి మినహాయింపు కోసం దాఖలు చేయాల్సిన పత్రాలను కూడా ఆన్లైన్లోనే దరఖాస్తు చేయవచ్చని వెల్లడించింది. ఈ మేరకు.. దేశంలోనే తొలిసారిగా ఓ పోర్టల్ను రూపొందించింది. దీనితో భౌతికంగా చేయాల్సిన పనులు తగ్గిపోతాయి.
ఈ ఆన్లైన్ ప్రక్రియను పౌర విమానయాన శాఖ, ఆరోగ్య-కుటుంబ సంక్షేమ శాఖ, విదేశంగ శాఖ, వివిధ రాష్ట్రాలు/కేంద్ర పాలిత ప్రాంతాల ప్రభుత్వాల అనుసంధానంతో కలిసి అభివృద్ధి చేసింది డీఐఏఎల్. ఈ వెసులుబాటు శనివారం నుంచే అమల్లోకి వచ్చింది.
ఐదు ప్రత్యేకమైన కేటగిరీల నుంచి మినహాయింపు కోరుకునే ప్రయాణికులు.. "www.newdelhiairport.in"లో ఈ-ఫాం నింపాల్సి ఉంటుంది. విమాన ప్రయాణానికి కనీసం 72గంటల ముందే.. సంబంధిత పత్రాలు, పాస్పోర్ట్ కాపీని సమర్పించాల్సి ఉంటుంది. స్వీయ ధ్రువీకరణ పత్రాలకు మాత్రం ఎలాంటి నిబంధనలు లేవు.
ఇదీ చూడండి:- విమాన ప్రమాద ఘటనా స్థలంలో భయానక దృశ్యాలు
